ବେଙ୍ଗାଲୁରୁ:ଆପଣ ପୋଲିସ ଅଫିସରଙ୍କ ବଦଳି ସମ୍ପର୍କରେ ଶୁଣିଥିବେ । ହେଲେ ଜଣେ ପୋଲିସ ବାବୁ ଗୋଟିଏ ସପ୍ତାହରେ 3ଟି ସ୍ଥାନକୁ ବଦଳି ହେବାର କେବେ ଶୁଣୁଛନ୍ତି କି ? କର୍ଣ୍ଣାଟକ ଚମାରାଜନଗର ଅଞ୍ଚଳରୁ ଏଭଳି ଏକ ଘଟଣା ସାମ୍ନାକୁ ଆସିଛି । ଏଠାରେ ଗୋଟିଏ ସପ୍ତାହ ମଧ୍ୟରେ ଜଣେ ପିଏସଆଇଙ୍କ(Police Sub-Inspector) 3ଟି ସ୍ଥାନକୁ ବଦଳି ହୋଇଛି । ଏହି ଅଫିସର ହେଉଛନ୍ତି ରବିକୁମାର ।
ରବିକୁମାର ଚମାରାଜନଗର ଇଷ୍ଟ ଷ୍ଟେସନର PSI ଥିଲେ । ପ୍ରଥମେ ମାର୍ଚ୍ଚ 6 ତାରିଖରେ ଚମାରାଜନଗରରୁ ତାଙ୍କର ବେଗର ଷ୍ଟେସନକୁ ବଦଳି କରାଯାଇଥିଲା । ଏହାପରେ ବେଗର ଷ୍ଟେସନରୁ ପୁଣି ବଦଳି କରାଯାଇ ଗୁଣ୍ଡଲପେଟ ଥାନାର କ୍ରାଇମ ଡିଭିଜନରେ କାର୍ଯ୍ୟ କରିବାକୁ ନିର୍ଦ୍ଦେଶ ଦିଆଯାଇଥିଲା । ଗତ 11 ତାରିଖ ଦିନ ପୁନର୍ବାର ରବିକୁମାରଙ୍କ ଗୁଣ୍ଡଲପେଟରୁ କୋଡାଗୁ ଜିଲ୍ଲାର ବିରଜାପେଟ ଥାନାକୁ ପୋଷ୍ଟିଂ କରାଯାଇଛି ।