ବେଙ୍ଗାଲୁର:ଦକ୍ଷିଣ ଭାରତ ରାଜନୀତିରେ ପୁଣି ଥରେ ହଲଚଲ । କର୍ଣ୍ଣାଟକ ରାଜନୀତିରେ ପୁଣି ହୋଇଛି କ୍ଷମତା ପରିବର୍ତ୍ତନ । ୩ ବର୍ଷ ମଧ୍ୟରେ ରାଜ୍ୟବାସୀ ଦେଖିବେ ୩ ଜଣ ମୁଖ୍ୟମନ୍ତ୍ରୀ । ୨୦୧୮ ବିଧାନସଭା ନିର୍ବାଚନରେ ରାଜ୍ୟରେ ସରକାର ଗଠନ କରିଥିବା ଜେଡିଏସ-କଂଗ୍ରେସକୁ କ୍ଷମତାଚ୍ୟୁତ କରି ଗାଦିରେ ବସିଥିଲେ ବିଏସ ୟେଦିରୁପ୍ପା । ଆଉ ୨ ବର୍ଷ ମୁଖ୍ୟମନ୍ତ୍ରୀ ରହିବା ପରେ ଆଜି ନିଜ ପଦରୁ ଇସ୍ତଫା ଦେଇଛନ୍ତି ଏହି ଅନୁଭବୀ ରାଜନେତା । ତେବେ କଣ ପାଇଁ ଦେଲେ ଇସ୍ତଫା ? କଣ ରହିଛି ବିଜେପିର ଯୋଜନା? କିଏ ହେବେ ରାଜ୍ୟର ପରବର୍ତ୍ତୀ ମୁଖ୍ୟମନ୍ତ୍ରୀ? ତାକୁ ନେଇ ଏବେ ଦିଲ୍ଲୀରୁ ବେଙ୍ଗାଲୁର ପର୍ଯ୍ୟନ୍ତ ଚାଲିଛି ଚର୍ଚ୍ଚା ।
ଆଜି ସରକାରକୁ ପୂରଣ ହେଲା ୨ ବର୍ଷ...
ଆଜି ହିଁ କର୍ଣ୍ଣାଟକ ବିଜେପି ସରକାରକୁ ୨ବର୍ଷ ପୂରଣ ହୋଇଛି । ଆଉ ସରକାରର ୨ବର୍ଷ ପୂର୍ତ୍ତୀ ଅବସରରେ ରାଜ୍ୟ ସରକାର ଆୟୋଜନ କରିଥିବା ବିଭିନ୍ନ କାର୍ଯ୍ୟକ୍ରମରେ ସାମିଲ ହୋଇଥିଲେ । ହେଲେ ଅଚାନକ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଉଥିବା ଘୋଷଣା କରିଥିଲେ ୟେଦିରୁପ୍ପା । ଏହାପରେ ଟ୍ବିଟ କରି ମୁଖ୍ୟମନ୍ତ୍ରୀ ବିଏସ ୟେଦିରୁପ୍ପା କହିଥିଲେ କର୍ଣ୍ଣାଟକ ଲୋକଙ୍କ ସେବା କରିବା ପାଇଁ ରାଜ୍ୟବାସୀ ସୁଯୋଗ ଦେଇଥିବାରୁ ମୁଁ ରାଜ୍ୟବାସୀଙ୍କ ନିକଟରେ କୃତଜ୍ଞ । ୨ ବର୍ଷ ଧରି ମୁଖ୍ୟମନ୍ତ୍ରୀ ରହିବା ମୋ ପାଇଁ ସମ୍ମାନର ବିଷୟ । ସେହିପରି ମୁଖ୍ୟମନ୍ତ୍ରୀ ଭାବେ କର୍ଣ୍ଣାଟକ ଜନତାଙ୍କ ସେବା କରିବାର ସୁଯୋଗ ଦେଇଥିବାରୁ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ ଦେଇଛନ୍ତି । ଏହାବାଦ ଗୃହମନ୍ତ୍ରୀ ଅମିତ ଶାହା, ଦଳର ଅଧ୍ୟକ୍ଷ ଜେପି ନଡ୍ଡାଙ୍କୁ ମଧ୍ୟ ଧନ୍ୟବାଦ ଦେଇଛନ୍ତି ।
ରବିବାର କହିଥିଲେ ଗୁରୁତୂପୂର୍ଣ୍ଣ କଥା...
ଗତକାଲି (ରବିବାର) ମୁଖ୍ୟମନ୍ତ୍ରୀ ବିଏସ ୟେଦିରୁପ୍ପା କହିଥିଲେ ମୁଖ୍ୟମନ୍ତ୍ରୀ ରହିବେ କି ନାହିଁ ଆସନ୍ତାକାଲି ପର୍ଯ୍ୟନ୍ତ ସ୍ପଷ୍ଟ ହୋଇଯିବ । ତେବେ ମୁଖ୍ୟମନ୍ତ୍ରୀ ରୁହନ୍ତୁ ବା ନରୁହନ୍ତୁ ଆଗାମୀ ୧୦ ରୁ ୧୫ ବର୍ଷ ପର୍ଯ୍ୟନ୍ତ ସେ ଦଳ ପାଇଁ କାମ କରିବେ ବୋଲି କହିଥିଲେ । ୭୮ ବର୍ଷିୟ ୟେଦିରୁପ୍ପା କର୍ଣ୍ଣାଟକ ରାଜନୀତିରେ ଜଣେ ପୁରୁଖା ଖେଳାଳି । ମୋଟ ୮ ଥର ବିଧାନସଭାକୁ ନିର୍ବାଚିତ ହୋଇଥିବା ୟେଦିରୁପ୍ପା ୨ ଥର ମୁଖ୍ୟମନ୍ତ୍ରୀ ହୋଇଥିଲେ ।