ନୂଆଦିଲ୍ଲୀ/ଭୋପାଳ:ମଧ୍ୟ ପ୍ରଦେଶ ବିଧାନସଭା ନିର୍ବାଚନରେ ନୈରାଶ୍ୟଜନକ ପ୍ରଦର୍ଶନ ପରେ ପିସିସି ସଭାପତି ପଦରୁ ହଟିଲେ ବରିଷ୍ଠ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ କମଲନାଥ । ତାଙ୍କ ସ୍ଥାନରେ ଯୁବନେତା ଜିତୁ ପଟ୍ଟଓ୍ବାରୀଙ୍କୁ ଦଳ ରାଜ୍ୟ ୟୁନିଟର ଦାୟିତ୍ବ ଦେଇଛି । ଯୁବ ନେତା ଜିତୁ କମଲନାଥଙ୍କ ସରକାରରେ ମନ୍ତ୍ରୀ ଭାବେ ଦାୟିତ୍ବ ନିର୍ବାହ କରିଥିଲେ । ମାତ୍ର ଚଳିତ ନିର୍ବାଚନରେ ସେ ପରାଜିତ ହୋଇଛନ୍ତି । ସାଓ ବିଧାନସଭା ନିର୍ବାଚନ ମଣ୍ଡଳୀରୁ ନିର୍ବାଚନ ଲଢି ସେ ଭାରତୀୟ ଜନତା ପାର୍ଟିର ପ୍ରାର୍ଥୀଙ୍କ ଠାରୁ ପ୍ରାୟ 35 ହଜାର ଭୋଟ ବ୍ୟବଧାନରେ ପରାଜିତ ହୋଇଛନ୍ତି ।
ସେହିପରି ପ୍ରଦେଶ ଅଧ୍ୟକ୍ଷ ବ୍ୟତୀତ କଂଗ୍ରେସ ଅନ୍ଯ କିଛି ଦାୟିତ୍ବରେ ମଧ୍ୟ ଆଜି ଘୋଷଣା କରିଛି । ଉମାଙ୍ଗ ସିଙ୍ଗରଙ୍କୁ କଂଗ୍ରେସ ବିଧାୟକ ଦଳର ନେତା ଭାବରେ ନିଯୁକ୍ତ କରିଛି । ଅର୍ଥାତ ସେ ହିଁ ବିଧାନସଭାରେ ବିରୋଧୀ ଦଳର ନେତା ହେବାକୁ ଯାଉଛନ୍ତି । ସେହିପରି ଅନ୍ୟତନ ବରିଷ୍ଠ ନେତା ହେମନ୍ତ କାଟାରେଙ୍କୁ ଉପନେତା ଭାବରେ ମନୋନୀତ କରିଛି ଦଳ । ତେବେ ନିର୍ବାଚନରେ କଂଗ୍ରେସର ନୈରାଶ୍ୟଜନକ ଫଳାଫଳ ପରେ ମଧ୍ୟ ପ୍ରଦେଶରେ ଦଳ ସାଙ୍ଗଠନିକ ଦାୟିତ୍ବ ପରିବର୍ତ୍ତନ କରିବା ନେଇ ଅନୁମାନ କରାଯାଉଥିଲା । ପ୍ରଦେଶ ଅଧ୍ୟକ୍ଷ ପଦରୁ କମଲନାଥଙ୍କୁ ଦଳ ଅପସାରଣ କରିବା ନେଇ ଯେଉଁ ଚର୍ଚ୍ଚା ହେଉଥିଲା, ତାହା ଆଜି ସତ ପ୍ରମାଣିତ ହୋଇଛି ।