ଥିରୁଅନନ୍ତପୁରମ:ଆଜି ପୂର୍ବାହ୍ନରେ କେରଳର ଏର୍ଣ୍ଣାକୁଲମର କାଲାମାସେରିରେ ଏକ ଧାର୍ମିକ ସ୍ଥଳୀରେ ହୋଇଥିବା ସିରିଜ ବିସ୍ଫୋରଣ ପାଇଁ ନିଜକୁ ଦାୟୀ କରିଛି ଜଣେ ବ୍ୟକ୍ତି । ସୋସିଆଲ ମିଡିଆରେ ଏକ ଭିଡିଓ ଜାରି କରି ଏହି ସିରିଜ ବିସ୍ଫୋରଣ ପାଇଁ ନିଜକୁ ଦାୟୀ କରିବାର କିଛି ସମୟ ମଧ୍ୟରେ ପୋଲିସ ନିକଟରେ ସେ ଆତ୍ମସମର୍ପଣ ମଧ୍ୟ କରିଛି । ଏହି ଆତ୍ମଘୋଷିତ ଅଭିଯୁକ୍ତ ନିଜକୁ ଡୋମିନିକ୍ ମାର୍ଟିନ ବୋଲି ପରିଚୟ ଦେବା ସହ ଥ୍ରୀସୁର ଜିଲ୍ଲାର ଏକ ଥାନାରେ ଆତ୍ମସମର୍ପଣ କରିଥିବା ଜଣାପଡିଛି । ସେ ଯିହୋବା ଓ୍ବିଟନେସ ଗୋଷ୍ଠୀ (Jehovah's Witnesses)ର ସଦସ୍ୟ ବୋଲି ମଧ୍ୟ ନିଜେ ପରିଚୟ ଦେଇଛି । ଏହି ଗୋଷ୍ଠୀ ହିଁ କନଭେନସନ ସେଣ୍ଟରରେ ପ୍ରାର୍ଥନା ସଭା ଆୟୋଜନ କରିଥିଲା ।
ଆତ୍ମସମର୍ପଣ କରିବା ପୂର୍ବରୁ 44 ବର୍ଷୀୟ ଡୋମିନିକ୍ ମାର୍ଟିନ ଫେସବୁକରେ ଏକ ଭିଡିଓ ପୋଷ୍ଟ କରିଥିଲା । ଯେଉଁଥିରେ ସେ ଏହି ଆକ୍ରମଣକୁ ଯଥାର୍ଥ ବୋଲି ଦର୍ଶାଇଥିଲା । ଉଭୟ ସ୍ଥାନୀୟ ମାଲାୟାଲମ୍ ଓ ହିନ୍ଦୀ ଭାଷାରେ ସେ ଏହି ଭିଡିଓ ଜାରି କରି ଆକ୍ରମଣ ପାଇଁ ନିଜକୁ ଦାୟୀ କରିଥିଲା । ତାର ମାତ୍ର କିଛି ସମୟ ମଧ୍ୟରେ ସେ ପୋଲିସ ନିକଟରେ ଆତ୍ମସମର୍ପଣ କରିଥିବା ଜଣାପଡିଛି । ପୋଲିସ ତାକୁ କୌଣସି ଅଜ୍ଞାତ ସ୍ଥାନକୁ କଡା ସୁରକ୍ଷା ମଧ୍ୟରେ ନେଇ ଜେରା କରୁଛି ।
କେରଳ ଏଡିଜିପି (ଆଇନ ଶୃଙ୍ଖଳା) ଏମ.ଆର ଅଜିତ କୁମାର ଗଣମାଧ୍ୟମକୁ କହିଛନ୍ତି ଯେ, ଏହି ବିସ୍ଫୋରଣରେ ଜଣେ ମହିଳାଙ୍କ ମୃତ୍ୟୁ ଘଟିଥିବା ବେଳେ 50ରୁ ଅଧିକ ଲୋକ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ କେତେକ ଗୁରୁତର ମଧ୍ୟ ରହିଛନ୍ତି । ସେମାନଙ୍କ ଚିକିତ୍ସା ଜାରି ରହିଛି । ବିସ୍ଫୋରଣ ପାଇଁ ନିଜକୁ ଦାୟୀ କରି ଆତ୍ମସମର୍ପଣ କରିଥିବା ଅଭିଯୁକ୍ତ ସମ୍ପର୍କରେ ତଦନ୍ତ କରାଯାଉଛି । ପ୍ରାଥମିକ ଅନୁସନ୍ଧାନ ଅନୁଯାୟୀ ଏହା ଏକ ଆଇଇଡି ବିସ୍ଫୋରଣ ବୋଲି ଜଣାପଡିଛି ।