ନୈନିତାଲ: ସ୍ଥଗିତ ହେଲା ବିଶ୍ବ ପ୍ରସିଦ୍ଧ କୈଳାଶ ମାନସରୋବର ଯାତ୍ରା । ମହାମାରୀ କୋରୋନା ସଂକ୍ରମଣକୁ ଦୃଷ୍ଟିରେ ରଖି ଚଳିତବର୍ଷ ମଧ୍ୟ ମାନସରୋବର ଯାତ୍ରାକୁ ସ୍ଥଗିତ ରଖାଯାଇଛି । କୋରୋନା ସଂକ୍ରମଣ ବୃଦ୍ଧି ଆଶଙ୍କାରେ ଦ୍ବିତୀୟ ଥର ପାଇଁ ମାନସରୋବର ଯାତ୍ରାକୁ ରଦ୍ଦ କରାଯାଇଛି ।
ଗତବର୍ଷ ମଧ୍ୟ କୋରୋନା ସଂକ୍ରମଣ ହେତୁ କୈଳାଶ ମାନସରୋବର ଯାତ୍ରାକୁ ବନ୍ଦ କରାଯାଇଥିଲା । ତେବେ ପ୍ରତିବର୍ଷ ଜୁନ 15ରୁ କୈଳାଶ ମାନସରୋବର ଯାତ୍ରା ଆରମ୍ଭ ହୋଇଥାଏ ।
ଏହାକୁ ନେଇ କୁମାଓ ମଣ୍ଡଳ ବିକାଶ ନିଗମଙ୍କ ଜିଏମ ଅଶୋକ କୁମାର ଯୋଶୀ କହିଛନ୍ତି ଯେ, ପ୍ରତିବର୍ଷ ପ୍ରାୟ 2 ହଜାର ଯାତ୍ରୀ ଏହି ଯାତ୍ରା ପାଇଁ ପଞ୍ଜୀକୃତ କରନ୍ତି । ସେଥିମଧ୍ୟରୁ ପାଖାପାଖି 1080 ଯାତ୍ରୀଙ୍କ ଚୟନ କରାଯାଇ ମେଡିକାଲ ପରୀକ୍ଷଣ ପରେ କୈଳାଶ ମାନସରୋବର ଯାତ୍ରା ପାଇଁ ଅନୁମତି ପ୍ରଦାନ କରାଯାଏ ।
ତେବେ ଏହି ଯାତ୍ରାରେ କୁମାଓ ମଣ୍ଡଳ ବିକାଶ ନିଗମକୁ ପାଖାପାଖି 56 ଲକ୍ଷରୁ ଅଧିକ ଆୟ ହେଉଥିଲା । ମାତ୍ର ଚଳିତଥର ଯାତ୍ରା ରଦ୍ଦ ହେବା କାରଣରୁ ସରକାରଙ୍କୁ ଲକ୍ଷାଧିକ ଟଙ୍କାର ରାଜସ୍ୱ କ୍ଷତି ସହିବାକୁ ପଡିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ