ହାଇଦ୍ରାବାଦ: ଉତ୍ତରଖଣ୍ଡର ଭୌଗଳିକ ବିପର୍ଯ୍ୟୟ ପ୍ରଭାବିତ ଯୋଶୀମଠରେ ମନ୍ଦିରରେ ବିବାହ କଲେ ଦମ୍ପତି । ଘରଗୁଡିକ କ୍ଷତିଗ୍ରସ୍ତ ହୋଇଥିବା ଯୋଗୁ ଉଭୟ ପରିବାର ନିକଟସ୍ଥ ଏକ ମନ୍ଦିରରେ ନିରାଡାମ୍ବର ଭାବରେ ବିବାହ କାର୍ଯ୍ୟ ସାରିଛନ୍ତି । ବିପର୍ଯ୍ୟୟ ପୂର୍ବରୁ ସ୍ଥାନୀୟ କୁମ୍ବର ପରିବାରରେ ଏହି ବିବାହ ସ୍ଥିରିକୃତ ହୋଇଥିବା ବେଳେ ବିପର୍ଯ୍ୟୟ କାରଣରୁ ସେମାନେ ଗଭୀର ଭାବେ ପ୍ରଭାବିତ ହୋଇଥିଲେ । ଫଳରେ ବିବାହ ରୋକିବାକୁ ପଡିଥିଲା । ଆଜି ଉଭୟ କୁମ୍ବର ପରିବାର ଓ ପ୍ରତିପକ୍ଷ କନ୍ୟା ପରିବାର ସଦସ୍ୟଙ୍କ ଉପସ୍ଥିତିରେ ସ୍ଥାନୀୟ ଗଢୀ ଭବାନୀ ମନ୍ଦିରରେ ଅତି ସାଧାରଣ ଭାବେ ବିବାହ ହୋଇଛି ।
ସୂଚନା ଅନୁସାରେ, ଯୋଶୀମଠ ଅନ୍ତର୍ଗତ ରୋହିତ କୁମ୍ବରଙ୍କ ଘରେ ଏହି ବିବାହ ଆୟୋଜନ କରାଯାଉଥିଲା । ହେଲେ ଭୂସ୍ଖଳନରେ ସେମାନଙ୍କ ଘର ବିଶେଷ ଭାବେ ପ୍ରଭାବିତ ହୋଇଥିଲା । ରୋହିତ କୁମ୍ବର ଘର ହୋଟେଲ ମାଉଣ୍ଟ ଭ୍ୟୁ ଏବଂ ମଲାରୀ ଇନର ନିକଟରେ ରହିଛି । ଫଳରେ ସେମାନେ ଚଳିତମାସ 3 ତାରିଖରେ ଅନ୍ୟ ପ୍ରଭାବିତ ପରିବାର ସହ ପ୍ରଶାସନ ଦ୍ବାରା ପ୍ରସ୍ତୁତ ରିଲିଫ୍ କ୍ୟାମ୍ପକୁ ସ୍ଥାନାନ୍ତର ହୋଇଥିଲେ ।