ନୂଆଦିଲ୍ଲୀ:ଜବାହାରଲାଲ ନେହେରୁ ବିଶ୍ବବିଦ୍ୟାଳୟରେ ଦୁଇ ଛାତ୍ର ଗୋଷ୍ଠୀଙ୍କ ମଧ୍ୟରେ ସଂଘର୍ଷର ଗୋଟିଏ ଦିନ ପରେ ଆକ୍ସନ ମୋଡକୁ ଆସିଛନ୍ତି ବିଶ୍ବବିଦ୍ୟାଳୟ କର୍ତ୍ତୃପକ୍ଷ । ହିଂସା ସୃଷ୍ଟିକାରୀ ତଥା କ୍ୟାମ୍ପସ ପରିସରରେ ସଦଭାବନା ନଷ୍ଟ କରୁଥିବା ଯେକୌଣସି ଛାତ୍ର ଓ ଗୋଷ୍ଠୀଙ୍କୁ ବରଦାସ୍ତ କରାଯିବ ନାହିଁ ଓ ଶୂନ୍ୟ ସହିଷ୍ଣୁତା ନୀତିରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ବିଶ୍ବବିଦ୍ୟାଳୟ କର୍ତ୍ତୃପକ୍ଷ କଡା ଚେତାବନୀ ଦେଇଛନ୍ତି ।
ଅନ୍ୟପଟେ ଗତକାଲି ସନ୍ଧ୍ୟାର ଘଟଣା ପରେ କାର୍ଯ୍ୟାନୁଷ୍ଠାନ ଦାବିରେ ପ୍ରଦର୍ଶନ କରୁଥିବା All India Students Association (AISA) ଛାତ୍ରଙ୍କୁ ଅଟକ ରଖିଛି ପୋଲିସ । ଆଜି ସର୍ଦ୍ଦାର ବଲ୍ଲଭ ପଟେଲ ହଲ ସାମ୍ନାରେ ପ୍ରଦର୍ଶନ କରିଥିଲେ AISA ସଦସ୍ୟ ଛାତ୍ରଛାତ୍ରୀ । ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ସେମାନଙ୍କୁୁ ପୋଲିସ ଅଟକ ରଖିଥିବା ସୂଚନା ମିଳିଛି । ଗତକାଲି ସନ୍ଧ୍ୟାରେ ଘଟିଥିବା ଛାତ୍ର ସଂଘର୍ଷରେ ଉଭୟ ଗୋଷ୍ଠୀର ଏକାଧିକ ଛାତ୍ରାଛାତ୍ରୀ ଆହତ ହୋଇଥିଲେ।