ହାଇଦ୍ରାବାଦ: ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କ ଗିରଫଦାରୀକୁ ନେଇ ରାଜନୀତିକ ଘମାସନ ଜାରି ରହିଛି । ଗିରଫଦାରୀକୁ କଡା ବିରୋଧ କରିବା ସହ ଚନ୍ଦ୍ରବାବୁ ନାଇଡୁଙ୍କ ସମର୍ଥନରେ ବାହାରିଛନ୍ତି ଜନ ସେନା ପାର୍ଟି ଅଧ୍ୟକ୍ଷ ପବନ କଲ୍ୟାଣ । ତାଙ୍କୁ ଭେଟିବାକୁ ଚାହୁଁଥିବା ବେଳେ ଅନୁମତି ନ ମିଳିବାକୁ ନେଇ ଜୋରଦାର ବିରୋଧ କରିଛନ୍ତି ପବନ କଲ୍ୟାଣ ।
ସୂଚନାଅନୁଯାୟୀ, ଶନିବାର ଦିନ ବିଳମ୍ୱିତ ରାତିରେ ଆନ୍ଧ୍ରପ୍ରଦେଶ ଓ ତେଲାଙ୍ଗାନୀ ସୀମା ନିକଟବର୍ତ୍ତୀ ଏନଟିଆର୍ ଜିଲ୍ଲା ଦେଇ ବିଜୟଓ୍ୱାଡା ଯାଉଥିବା ବେଳେ ଏକ ଚେକ୍ ପୋଷ୍ଟ ନିକଟରେ ପବନ କଲ୍ୟାଣ ଓ ତାଙ୍କ ସହଯୋଗୀକୁ ଅଟକାଇଥିଲା ପୋଲିସ । ଘଟଣାସ୍ଥଳରେ ଉତ୍ତେଜନା ସ୍ଥିତି ଦେଖିବାକୁ ମିଳିଥିଲା । କଣ ପାଇଁ ତାଙ୍କୁ ବିଜୟଓ୍ବାଡା ଯିବାକୁ ଅନୁମତି ମିଳୁନି ସେନେଇ ପ୍ରଶ୍ନ କରିଥିଲେ ପବନ କଲ୍ୟାଣ । ଘଟଣାସ୍ଥଳରେ ରାସ୍ତାରୋକ କରିବା ସହ ରାସ୍ତା ମଝିରେ ଶୋଇରହିଥିଲେ ପବନ କଲ୍ୟାଣ । ହେଲେ ତାଙ୍କୁ ବିଜୟଓ୍ବାଡା ଯିବାପାଇଁ ଅନୁମତି ମିଳିନଥିଲା ।
ଜେଏସପି ନେତା ମନୋହର ନାନ୍ଦେଡଲା ଏନେଇ ସୋସିଆଲ ମିଡିଆରେ ଏକ ଭିଡିଓ ଜାରି କରିଛନ୍ତି । ଯେଉଁଥିରେ ଆନ୍ଧ୍ରପ୍ରଦେଶକୁ ପ୍ରବେଶ କରିବା ପାଇଁ ଭିସା ପାର୍ସପୋର୍ଟର ଆବଶ୍ୟକତା ଅଛି ବୋଲି ପୋଲିସ ଅଧିକାରୀଙ୍କୁ ପବନ କଲ୍ୟାଣ ପ୍ରଶ୍ନ ପଚାରୁଥିବା ଦେଖିବାକୁ ମିଳିଛି । ଏହାପୂର୍ବରୁ ବି ବିମାନ ଯୋଗେ ଆନ୍ଧ୍ରପ୍ରଦେଶରେ ପ୍ରବେଶ କରିବାକୁ ଚେଷ୍ଟା କରିଥିଲେ । ହେଲେ ତାଙ୍କୁ ଅନୁମତି ମିଳିନଥିଲା ।
ସୂଚନାଯୋଗ୍ୟ, ତେଲୁଗୁ ଦେଶମ ପାର୍ଟି(ଟିଡିପି) ମୁଖ୍ୟ ଚନ୍ଦ୍ରବାବୁ ନାଇଡ଼ୁଙ୍କ ଗିରଫଦାରୀକୁ ନେଇ ରାଜନୀତି ସରଗରମ ରହିଛି । ଚନ୍ଦ୍ରବାବୁ ନାଇଡ଼ୁଙ୍କ ଗିରଫଦାରୀକୁ ଦୃଢ଼ ନିନ୍ଦା କରିବା ସହ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡିଙ୍କୁ କଡ଼ା ସମାଲୋଚନା କରିଛନ୍ତି ପବନ କଲ୍ୟାଣ ।