ଫିଲ୍ମ ଷ୍ଟାଇଲରେ ବନ୍ଧୁକ ଧରି ହସ୍ପିଟାଲରେ ପହଞ୍ଚିଲେ ବିଧାୟକ: କହିଲେ ଲାଇସେନ୍ସ ଅଛି ଏଇଟା ମୋ ଷ୍ଟାଇଲ୍‌

ପୁଣି ଚର୍ଚ୍ଚାରେ ବିହାର ବିଧାୟକ ଗୋପାଳ ମଣ୍ଡଳ । ହାତରେ ବନ୍ଧୁକ ଧରି ହସ୍ପିଟାଲରେ ପହଞ୍ଚିଲେ । କହିଲେ ଲାଇସେନ୍ସ ରଖିଛି ଏଇଟା ମୋ ଷ୍ଟାଇଲ । ଅଧିକ ପଢନ୍ତୁ

ପାଟନା:ନାତୁଣୀର ଚିକିତ୍ସା ପାଇଁ ହସ୍ପିଟାଲ ଆସିଥିଲେ ବିଧାୟକ । ହେଲେ ହାତରେ ଥିଲା ରିଭଲଭର । ନିକଟରେ ସୁରକ୍ଷାକର୍ମୀ ଓ ଅଙ୍ଗରକ୍ଷୀ ମଧ୍ୟ ଥିଲେ । ହେଲେ ବିଧାୟକ ନିଜେ ହାତରେ ଦବଙ୍ଗ ଷ୍ଟାଇଲରେ ଏକ ରିଭଲଭର ଧରିଥିବା ଦେଖିବାକୁ ମିଳିଥିଲା । ବିହାର ଜେଡିୟୁ ବିଧାୟକ ଗୋପାଳ ମଣ୍ଡଳଙ୍କୁ ଆଜି ପାଟନାର ଜବାହାରଲାଲ ନେହେରୁ ମେଡିକାଲ କଲେଜ (JLNMCH)ରେ ଏପରି ଭାବେ ଦେଖିବାକୁ ମିଳିଛି । ହେଲେ ହସ୍ପିଟାଲ ପରି ଏକ ସର୍ବସାଧାରଣ ସ୍ଥାନରେ ହାତରେ ଏପରି ମାରଣାସ୍ତ୍ର ଧରିବା ପ୍ରଶ୍ନରେ ବିଧାୟକଙ୍କ ଉତ୍ତର ମଧ୍ୟ କିଛି ଦବଙ୍ଗଗିରି ଠାରୁ କମ ନଥିଲା । ତାଙ୍କର ଲାଇସେନ୍ସ ଅଛି । ସେ ଧରିବେ, ଏହା ତାଙ୍କର ଷ୍ଟାଇଲ ବୋଲି କହିଥିଲେ ବିଧାୟକ ଗୋପାଳ ।

ଭିଡିଓରେ ଦେଖିବାକୁ ମିଳିଥିବା ଦୃଶ୍ୟ ଅନୁସାରେ, ବିଧାୟକ ଓ ତାଙ୍କର ସୁରକ୍ଷାକର୍ମୀ ହସ୍ପିଟାଲ ଭିତରେ ଛିଡା ହୋଇଛନ୍ତି । ବିଧାୟକ ଗୋପାଳ ମଣ୍ଡଳ ନିଜେ ହାତରେ ଏକ ରିଭଲଭର ଧରିଛନ୍ତି । କିଛି ହସ୍ପିଟାଲ କର୍ମଚାରୀଙ୍କ ସହ କଥାବାର୍ତ୍ତା କରୁଛନ୍ତି । ଏ ସମ୍ପର୍କରେ ଗୋପାଳ କହିଥିଲେ,‘‘ଆମର ଅନେକ ରାଜନୈତିକ ପ୍ରତିଦ୍ୱନ୍ଦ୍ୱିତା ଅଛି, ସେଥିପାଇଁ ଆମେ ଅସ୍ତ୍ରଶସ୍ତ୍ର ରଖୁଛୁ । ଏହା ପାଇଁ ଲାଇସେନ୍ସ ମଧ୍ୟ ଅଛି । ଅତୀତରେ ଅପରାଧୀମାନେ ମୋ ପଛରେ ପଡିଥିଲେ ଏବଂ ସେଥିପାଇଁ ମୁଁ ଅସ୍ତ୍ରଶସ୍ତ୍ର ରଖିଥିଲି । ବର୍ତ୍ତମାନ ରାଜନୈତିକ ପ୍ରତିଦ୍ବନ୍ଦ୍ବୀମାନେ ପଛରେ ଅଛନ୍ତି । ସେମାନେ ଜାଣନ୍ତି ଯେ ମୁଁ ଆଗାମୀ ନିର୍ବାଚନରେ ​​ସାଂସଦ ହେବାକୁ ଯାଉଛି ଏବଂ ତେଣୁ ସେମାନେ ମୋ ପଛରେ ପଡିଛନ୍ତି । ମୁଁ ଆତ୍ମରକ୍ଷା ପାଇଁ ମୋ ହାତରେ ରିଭଲଭର ଧରିଛି । ’’

ସେହିପରି ଲାଇସେନ୍ସ ଥିଲେ ସୁଦ୍ଧା ହସ୍ପିଟାଲ ପରି ସାଧାରଣ ସ୍ଥାନରେ ହାତରେ ଏହାକୁ ଧରିବା ସମ୍ପର୍କିତ ପ୍ରଶ୍ନରେ ଗୋପାଳ କହିଛନ୍ତି, ଏହା ହାତରେ ଧରିବା ଉପକରଣ, ଭିତରେ ରଖିବା ନୁହେଁ । ତାଙ୍କର ଏହି ଷ୍ଟାଇଲକୁ ତାଙ୍କ ସମର୍ଥକମାନେ ପସନ୍ଦ କରନ୍ତି । ଦୁଇଦିନ ତଳେ ପ୍ରକାଶ ପାଇଥିବା ବିହାର ଜାତିଭିତ୍ତିକ ଜନଗଣନା ରିପୋର୍ଟକୁ ଇସାରା କରି ଗୋପାଳ କହିଥିଲେ, ଏହି ରିପୋର୍ଟରୁ ସ୍ପଷ୍ଟ ଯେ, ତାଙ୍କ ଜାତିବର୍ଗର ଭୋଟର ରାଜ୍ୟରେ ସର୍ବାଧିକ । ସେମାନେ ତାଙ୍କୁ ନିଶ୍ଚୟ ଏଥର ସାଂସଦ ଭାବେ ନିର୍ବାଚିତ କରିବେ ।

ବ୍ୟୁରୋ ରିପୋର୍ଟ, ଇଟିଭି ଭାରତ