ଚଣ୍ଡିଗଡ:ଜଳନ୍ଧର ଲୋକସଭା ଉପନିର୍ବାଚନରେ ବାଜି ମାରିଲା ଆପ୍ । ବିଜୟୀ ହେଲେ ଆମ୍ ଆଦାମୀ ପାର୍ଟି ପ୍ରାର୍ଥୀ ସୁଶୀଲ ରିଙ୍କୁ । ସୁଶୀଲ ୫୮,୬୪୭ ଖଣ୍ଡ ଭୋଟ ବ୍ୟବଧାନରେ ନିକଟତମ ପ୍ରତିଦ୍ବନ୍ଦୀ କଂଗ୍ରେସ ପ୍ରାର୍ଥୀ କରମଜିତ କୌର ଚୌଧୁରୀଙ୍କୁ ହରାଇ ବମ୍ପର ବିଜୟ ହାସଲ କରିଛନ୍ତି । ତାଙ୍କୁ ସମୁଦାୟ ୩,୦୨,୦୯୭ ଖଣ୍ଡ ଭୋଟ ମିଳିଛି । କଂଗ୍ରେସ ପ୍ରାର୍ଥୀ ୨,୪୩,୪୫୦ ଖଣ୍ଡ ଭୋଟ ସହ ଦ୍ବିତୀୟରେ ଅଛନ୍ତି । ଶିରୋମଣି ଅକାଳୀ ଦଳ ଏବଂ ବହୁଜନ ସମାଜବାଦୀ ପାର୍ଟି ୧,୫୮,୩୫୪ ଭୋଟ ପାଇଥିବା ବେଳେ ୧,୩୪,୭୦୭ ଭୋଟ ସହ ବିଜେପି ପ୍ରାର୍ଥୀ ପଛରେ ରହିଛନ୍ତି ।
ସୁଶୀଲ କୁମାର ରିଙ୍କୁ ଜଳନ୍ଧର ପଶ୍ଚିମ ନିର୍ବାଚନ ମଣ୍ଡଳୀରୁ କଂଗ୍ରେସର ପୂର୍ବତନ ବିଧାୟକ ଥିଲେ । ହେଲେ ପଞ୍ଜାବରେ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ସରକାର ଆସିବା ପରେ ପରବର୍ତ୍ତୀ ସମୟରେ ସେ କଂଗ୍ରେସ ଛାଡି ଆପ୍ରେ ମିଶିଥିଲେ । ଭାରତ ଯୋଡୋ ଯାତ୍ରା ସମୟରେ ଜଳନ୍ଧର କଂଗ୍ରେସ ସାଂସଦ ସନ୍ତୋଖ ଚୌଧୁରୀଙ୍କ ଦେହାନ୍ତ ପରେ ଏହି ଲୋକସଭା ଆସନରେ ଉପନିର୍ବାଚନ ଅନୁଷ୍ଠିତ ହୋଇଥିଲା । କଂଗ୍ରେସ ଦିବଙ୍ଗତ ସାଂସଦଙ୍କ ପତ୍ନୀ କରମଜିତ କୌରଙ୍କୁ ପ୍ରାର୍ଥୀ କରିଥିଲା । କିନ୍ତୁ ଆପ୍ ପ୍ରାର୍ଥୀ ବିପୁଳ ଭୋଟ ବ୍ୟବଧାନରେ କୌରଙ୍କୁ ପରାଜିତ କରି ବଡ ବିଜୟ ହାସଲ କରିଛନ୍ତି । ଏନେଇ ରାଘବ ଚଢାଙ୍କ ସମେତ ପଞ୍ଜାବ ରାଜ୍ୟ କଂଗ୍ରେସ ମୁଖ୍ୟ ଅମରିନ୍ଦର ସିଂହ ରାଜା ୱାରିଂ ଟ୍ବିଟ୍ କରି ସୁଶୀଲ ରିଙ୍କୁଙ୍କୁ ଶୁଭେଚ୍ଛା ଜଣାଇଛନ୍ତି ।
ଏହାମଧ୍ୟ ପଢନ୍ତୁ: Jharsuguda By poll Results: ଦୀପାଳିଙ୍କ ବୃହତ ବିଜୟ, ଭାଙ୍ଗିଲେ ବାପାଙ୍କ ରେକର୍ଡ