ୱାଶିଂଟନ: କୋରୋନା ମହାମାରୀ ଭଳି ବଡ଼ ବିପଦ ବେଳେ ଆମେରିକା ଭାରତକୁ ଦୃଢ ସମର୍ଥନ କରିବା ସହିତ ବିଭିନ୍ନ ପ୍ରକାର ସହାୟତା ପ୍ରଦାନ କରିଛି । ଏଥିଲାଗି ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଆମେରିକାର ପ୍ରତିପକ୍ଷ ଆଣ୍ଟୋନି ବ୍ଲିଙ୍କେନଙ୍କ ସହିତ ଶୁକ୍ରବାର କଥାବାର୍ତ୍ତା ସମୟରେ ବାଇଡେନ ସରକାରଙ୍କୁ ଧନ୍ୟବାଦ ଜଣାଇଛନ୍ତି ।
ଗତ ସୋମବାର ଜୟଶଙ୍କର ଆମେରିକାକୁ 5 ଦିନିଆ ଗସ୍ତରେ ଯାଇଥିଲେ । ବାଇଡେନ ପ୍ରଶାସନର କାର୍ଯ୍ୟକାଳ ସମୟରେ ଜୟଶଙ୍କର ପ୍ରଥମ ଭାରତୀୟ କ୍ୟାବିନେଟ ମନ୍ତ୍ରୀ ଭାବେ ଆମେରିକା ଗସ୍ତରେ ଯାଇଥିଲେ । ରାଜ୍ୟ ବିଭାଗକୁ ଜୟଶଙ୍କରଙ୍କୁ ସ୍ବାଗତ କରିବା ସମୟରେ ବ୍ଲିଙ୍କେନ ଭାରତ ପୂର୍ବରୁ ଆମେରାକୁ କରିଥିବା ସହାୟତାକୁ ମନେ ପକାଇଥିଲେ । ଆମେରିକା ଭାରତର ସହାୟତାକୁ କେବେ ଭୁଲି ପାରିବ ନାହିଁ ବୋଲି ସେ କହିଥିଲେ । ଭାରତ ବିପଦ ସମୟରେ ଆମେରିକା ସହିତ ଠିଆ ହୋଇଥିବା ବେଳେ ଆମେରିକା ମଧ୍ୟ ଭାରତ ସହିତ ରହିବ ବୋଲି ସେ କହିଥିଲେ ।