ଶ୍ରୀନଗର: ଜମ୍ମୁ-କାଶ୍ମୀର ଉପରାଜ୍ୟପାଳ ମନୋଜ ସିହ୍ନା(J&K LG Manoj Sinha) ରବିବାର ଦକ୍ଷିଣ କାଶ୍ମୀର ଅନ୍ତର୍ଗତ ଅନନ୍ତନାଗ ସ୍ଥିତ ମାର୍ତଣ୍ଡ ସୂର୍ଯ୍ୟ ମନ୍ଦିରରେ ଆୟୋଜିତ ଏକ ଧାର୍ମିକ ସମାରୋହରେ ଯୋଗ ଦେଇଥିଲେ । ଏହି ଐତିହାସିକ ମନ୍ଦିରରେ ଉପରାଜ୍ୟପାଳ ପୂଜାର୍ଚ୍ଚନା ମଧ୍ୟ କରିଥିଲେ । ଯାହାକୁ ନେଇ ଅସନ୍ତୋଷ ପ୍ରକାଶ କରିଛି ପ୍ରତ୍ନତାତ୍ତ୍ବିକ ସର୍ବେକ୍ଷଣ ସଂସ୍ଥା (ASI) । କାରଣ ମାର୍ତଣ୍ଡ ସୂର୍ଯ୍ୟ ମନ୍ଦିରଟି ଏଏସଆଇ ଅଧୀନରେ ସଂରକ୍ଷିତ ରହିଛି ।
ଏଠାରେ ପୂଜାର୍ଚ୍ଚନା ପାଇଁ ଏଏସଆଇ ଅନୁମତି ନଥିବା ବେଳେ ମନୋଜ ସିହ୍ନା ମନ୍ଦିର ଆୟୋଜିତ ପୂଜାରେ ସାମିଲ ହୋଇଛନ୍ତି । ତେଣୁ ଏହା ନିୟମର ଉଲ୍ଲଙ୍ଘନ ବୋଲି ASI କହିଛି । ବିନା ଅନୁମତିରେ ମନ୍ଦିରରେ କିପରି ପୂଜାର୍ଚ୍ଚନା କରାଗଲା ସେନେଇ ଜିଲ୍ଲା ପ୍ରଶାସନଙ୍କୁ ପ୍ରଶ୍ନ କରିଛି ସର୍ବେକ୍ଷଣ ସଂସ୍ଥା । ଅନନ୍ତନାଗ ସ୍ଥିତ ଏହି ପ୍ରାଚୀନ ସୂର୍ଯ୍ୟ ମନ୍ଦିରଟି ଅଷ୍ଟମ ଶତାବ୍ଦୀରେ(8th Century) ନିର୍ମିତ ହୋଇଥିଲା । ମାତ୍ର ଏଠାରେ କୌଣସି ପ୍ରକାର ପୂଜାର୍ଚ୍ଚନା କରାଯାଏ ନାହିଁ ।