ହାଇଦ୍ରାବାଦ: ଚନ୍ଦ୍ରଯାନ-୩ ଗତକାଲି ପ୍ରପଲସନ ମଡ୍ୟୁଲଠୁ ଅଲଗା ହେବା ପରେ ଆଜି (ଶୁକ୍ରବାର) ସଫଳତାର ସହିତ ପ୍ରଥମ ଡିବୁଷ୍ଟିଂ ପ୍ରକ୍ରିୟା ଶେଷ ହୋଇଛି । ଆଜି ଅପରାହ୍ନ ୪ଟାରେ ଲ୍ୟାଣ୍ଡର ବିକ୍ରମ ନିଜର ବେଗ କମାଇ ଚନ୍ଦ୍ରପୃଷ୍ଠର ନିକଟତର ହୋଇଛି । ଏହାସହିତ ଲ୍ୟାଣ୍ଡର ପଠାଇଥିବା ଚନ୍ଦ୍ରର ଏକ ନୂଆ ଭିଡିଓ ମଧ୍ୟ ସେୟାର କରିଛି । ଆସନ୍ତା ୨୩ ତାରିଖ ସନ୍ଧ୍ୟା ୫ଟା ୪୫ ମିନିଟରେ ଚନ୍ଦ୍ରପୃଷ୍ଠରେ ସଫ୍ଟଲ୍ୟାଣ୍ଡିଂ ହେବାକୁ ଥିବା ବେଳେ ଆଜିଠୁ ଡିବୁଷ୍ଟିଂ ପ୍ରକ୍ରିୟା ଆରମ୍ଭ ହୋଇଛି ।
ଇସ୍ରୋ ପକ୍ଷରୁ ଆଜି ସେୟାର ହୋଇଥିବା ଭିଡିଓଟି ଗତ ୧୫ ତାରିଖରେ ଉତ୍ତୋଳନ କରିଥିଲା ଲ୍ୟାଣ୍ଡର ବିକ୍ରମ । ଗତ ଜୁଲାଇ ୧୪ ତାରିଖରେ ଆନ୍ଧ୍ରପ୍ରଦେଶରୁ ଶ୍ରୀହରିକୋଟା ସ୍ପେଶ ସେଣ୍ଟରରୁ ଲଞ୍ଚ ହୋଇଥିବା ଚନ୍ଦ୍ରଯାନ-୩ ଚଳିତ ମାସ ୧୫ ତାରିଖରେ ଚନ୍ଦ୍ର କକ୍ଷପଥରେ ପ୍ରବେଶ କରିଥିଲା । ଆଜି ଏହା ନିଜର ବେଗ କମାଇ ସଫ୍ଟ ଲ୍ୟାଣ୍ଡିଂ ପାଇଁ ପ୍ରକ୍ରିୟା ଆରମ୍ଭ କରିଛି । ଏହା ମଧ୍ୟ ଏକ ଗୁରୁତ୍ବପୂର୍ଣ୍ଣ ପ୍ରକ୍ରିୟା ରହିଥିବା ବେଳେ ତାହା ସଫଳ ହୋଇଛି । ଏହାପରେ ଇସ୍ରୋ ପକ୍ଷରୁ ଲ୍ୟାଣ୍ଡର ବିକ୍ରମ ଦ୍ବାରା ପ୍ରେରିତ ହୋଇଥିବା ଭିଡିଓ ସେୟାର କରାଯାଇଛି । ଯେଉଁଥିରେ ଆକର୍ଷଣୀୟ ଚନ୍ଦ୍ରପୃଷ୍ଠ ଦେଖିବାକୁ ମିଳିଛି । ଏଥିରେ ଚନ୍ଦ୍ରର ଟପୋଗ୍ରାଫି ଓ ଉପାଦାନ ଦେଖିବାକୁ ମିଳିଛି ।