ମସ୍କୋ/ନୂଆଦିଲ୍ଲୀ:ଭାରତର ଜଣେ ଶୀର୍ଷ ନେତାଙ୍କୁ ଆତ୍ମଘାତୀ ଆକ୍ରମଣରେ ହତ୍ୟା କରିବାର ଥିଲା ଯୋଜନା । ଇସଲାମିକ ଆତଙ୍କବାଦୀ ସଂଗଠନ ଏହି ହତ୍ୟା ଷଡଯନ୍ତ୍ର କରିଥିଲା । କୌଣସି ମୁହୂର୍ତ୍ତରେ ଏହି ହତ୍ୟାକାଣ୍ଡକୁ ରୂପ ଦିଆ ଯାଇଥାନ୍ତା । ଋଷରେ ଜଣେ ଆତ୍ମଘାତୀ ଆତଙ୍କବାଦୀକୁ ଗିରଫ କରିବା ପରେ ତା ନିକଟରୁ ଏପରି ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି । ଏହାକୁ ନେଇ ତୁରନ୍ତ ଋଷ ପକ୍ଷରୁ ଭାରତକୁ ସତର୍କ କରାଯାଇଛି । ଏହି କାର୍ଯ୍ୟାନୁଷ୍ଠାନ ସମ୍ପର୍କରେ ଋଷର ଗଣମାଧ୍ୟମରେ ତଥ୍ୟ ପ୍ରକାଶ ପାଇଛି ।
ଆଜି (ସୋମବାର) ଋଷର ଜାତୀୟ ସୁରକ୍ଷା ସଂସ୍ଥା (Russian Federal Security Service (FSB) ଏହି ଆତଙ୍କବାଦୀକୁ ଗିରଫ କରିବାରେ ସଫଳ ହୋଇଛି । ପ୍ରାଥମିକ ତଦନ୍ତ ପରେ ଉକ୍ତ ଆତଙ୍କବାଦୀ ଠାରୁ ଯାହା ତଥ୍ୟ ମିଳିଛି, ତାହା ସମସ୍ତଙ୍କୁ ଚମକାଇ ଦେଇଛି । ଗିରଫ ଆତଙ୍କବାଦୀ କୁଖ୍ୟାତ ସଂଗଠନ ISISର ସକ୍ରିୟ ସଦସ୍ୟ ଓ ଜଣେ ଆତ୍ମଘାତୀ ଆକ୍ରମଣକାରୀ ମଧ୍ୟ । ସେ ଆତ୍ମଘାତୀ ଆକ୍ରମଣ ମିଶନରେ ନିୟୋଜିତ ରହିଛି । ଭାରତର ଜଣେ ଶୀର୍ଷ ନେତାଙ୍କୁ ଆତ୍ମଘାତୀ ଆକ୍ରମଣରେ ହତ୍ୟା କରିବାର ମୂଳ ଯୋଜନା ଥିବା ଉକ୍ତ ଆତଙ୍କୀ ଋଷ ଏଜେନ୍ସି ନିକଟରେ ପ୍ରକାଶ କରିଛି । ତେବେ ଏହି ତଥ୍ୟ ଭାରତ ନିକଟରେ ପହଞ୍ଚିବା ପରେ ଭାରତରେ ମଧ୍ୟ ତତ୍ପରତା ପ୍ରକାଶ ପାଇଛି । ଗୁଇନ୍ଦା ସଂସ୍ଥା ଓ ଅନ୍ୟ ଏଜେନ୍ସିଂଗୁଡିକ ମଧ୍ୟ ଆତଙ୍କୀ ଗତିବିଧି ନେଇ ତଦନ୍ତ ଆରମ୍ଭ କରି ସାରିଛନ୍ତି ।