ନୂଆଦିଲ୍ଲୀ:ଦେଶଦ୍ରୋହ ଆଇନ ସମ୍ପର୍କିତ ଶୁଣାଣି ସମୟରେ ଗୁରୁତ୍ବପୂର୍ଣ୍ଣ ଟିପ୍ପଣୀ କରିଛନ୍ତି ସୁପ୍ରିମକୋର୍ଟ । ଏହି ଆଇନ ଉପନିବେଶବାଦ ଆଇନ, ଯାହା ସ୍ବାଧୀନତା ଆନ୍ଦୋଳନ ସମୟରେ ଇଂରେଜଙ୍କ ଦ୍ବାରା ମହାତ୍ମା ଗାନ୍ଧୀଙ୍କ ସମେତ ଅନେକ ସଂଗ୍ରାମୀଙ୍କ ସ୍ବର ଚପାଇଦେବାକୁ ପ୍ରୟୋଗ କରାଯାଉଥିଲା । ତେବେ ବର୍ତ୍ତମାନ ଏହି ଆଇନର କଣ ଆବଶ୍ୟକତା ରହିଛି ବୋଲି ପ୍ରଶ୍ନ କରିଛନ୍ତି ସୁପ୍ରିମକୋର୍ଟ ।
ସୁପ୍ରିମକୋର୍ଟର ପ୍ରଧାନ ବିଚାରପତି ଏନଭି ରମଣା କହିଛନ୍ତି, ଯଦି କୌଣସି ପକ୍ଷ ଅନ୍ୟ ପକ୍ଷର ରାୟ ଶୁଣିବାକୁ ପ୍ରସ୍ତୁତ ନୁହେଁ, ତେବେ ତା ବିରୋଧରେ ଅତି ସହଜରେ ଦେଶଦ୍ରୋହ ଆଇନର ବ୍ୟବହାର ହେଉଛି । ଆଉ ଏହାର କୌଣସି ଉତ୍ତରଦାୟୀ ରହୁନାହିଁ ।
ସିଜେଆଇ ଏନଭି ରମଣା ଆଟର୍ଣ୍ଣୀ ଜେନେରାଲ କେକେ ଭେନୁଗୋପାଳଙ୍କୁ କହିଛନ୍ତି, ସରକାର ଅନେକ ପୁରୁଣା ଆଇନ ରଦ୍ଦ କରିସାରିଛି । ତେବେ ଆଇପିସି ଧାରା 124-A କୁ ରଦ୍ଦ କରିବାକୁ ସରକାର କଣ ପାଇଁ ବିଚାର କରୁନାହାଁନ୍ତି ବୋଲି ପ୍ରଶ୍ନ କରିଛନ୍ତି ପ୍ରଧାନ ବିଚାରପତି । ଏହା ଉପରେ କେନ୍ଦ୍ର ପକ୍ଷରୁ ଦେଶଦ୍ରୋହ ଆଇନକୁ ରଦ୍ଦ କରିବା ନେଇ ବିରୋଧ କରିଛନ୍ତି ଆଟର୍ଣ୍ଣୀ ଜେନେରାଲ ।