ନୂଆଦିଲ୍ଲୀ:ଶେଷ ପର୍ଯ୍ୟାୟରେ ପହଞ୍ଚଛି ଭାରତ ସରକାରଙ୍କ ଦ୍ବାରା ଜାରି ରହିଥିବା ଅପରେସନ ଗଙ୍ଗା । ଏବେ ସୁଦ୍ଧା ପ୍ରାୟ 21 ହଜାର ଛାତ୍ରଛାତ୍ରୀଙ୍କୁୁ ଉଦ୍ଧାର କରି ସ୍ବଦେଶ ଫେରାଇ ଆଣି ସାରିଥିବାବେଳେ ଅନ୍ୟମାନଙ୍କୁ ମଧ୍ୟ ହଙ୍ଗେରୀ ରାଜଧାନୀ ବୁଦାପେଷ୍ଟରେ ପହଞ୍ଚିବା ପାଇଁ ନିର୍ଦ୍ଦିଷ୍ଟ ସମୟ ଦେଇଛି କିବରେ ଅବସ୍ଥାପିତ ଭାରତୀୟ ଦୂତାବାସ । ପୂର୍ବାହ୍ନ 10ରୁ 12ଟା ମଧ୍ୟରେ ସେମାନଙ୍କୁୁ ବୁଦାପେଷ୍ଟର ସିଟି ସେଣ୍ଟରରେ ପହଞ୍ଚିବା ପାଇଁ ପରାମର୍ଶ ଦିଆଯାଇଛି । ଏନେଇ ଦୂତାବାସ ପକ୍ଷରୁ ଏକ ପ୍ରେସ ବାର୍ତ୍ତା ମାଧ୍ୟମରେ ସମସ୍ତଙ୍କୁ ଅବଗତ କରାଯାଇଛି ।
ଏବେ ସୁଦ୍ଧା ଯୁଦ୍ଧଗ୍ରସ୍ତ ଅଞ୍ଚଳରେ ଫସି ରହିଥିବା ଭାରତୀୟଙ୍କୁ ତୁରନ୍ତ ସେମାନଙ୍କ ସମ୍ପର୍କିତ ଜରୁରୀ ସୂଚନା ପ୍ରଦାନ କରିବା ପାଇଁ କୁହାଯାଇଛି । ସେମାନଙ୍କ ନାମ, ପାସପୋର୍ଟ ନମ୍ବର ଓ ବର୍ତ୍ତମାନର ଠିକଣା ସମ୍ପର୍କରେ ସୂଚନା ଦେବା ପାଇଁ ଏକ ଅନଲାଇନ ଗୁଗୁଲ ଫର୍ମ ମଧ୍ୟ ବ୍ୟବସ୍ଥା କରିଛିି ଦୂତାବାସ । ଫଳରେ ସେମାନଙ୍କୁ ତୁରନ୍ତ ଚିହ୍ନଟ କରାଯିବା ସହ ସେମାନଙ୍କୁ ହଙ୍ଗେରୀ ଅଭିମୁଖେ ମଧ୍ୟ ଆଣିବାର ବ୍ୟବସ୍ଥା କରାଯାଇ ପାରିବ ।