ନୂଆଦିଲ୍ଲୀ: ଭାରତୀୟ ତଟ ସୁରକ୍ଷା ଦାୟିତ୍ବ ଇଣ୍ଡିଆନ କୋଷ୍ଟଗାର୍ଡ ବା ଭାରତୀୟ ତଟରକ୍ଷାବାହିନୀ ହାତରେ ଅର୍ପଣ କରାଯାଇଛି । ଏ ନେଇ ତଟରକ୍ଷାବାହିନୀର ଯବାନମାନେ ଜୀବନକୁ ଉତ୍ସର୍ଗ କରିଛନ୍ତି । ସ୍ଥଳ ଜଳ ଓ ଆକାଶରେ ଦେଶକୁ ସୁରକ୍ଷା ଦେବା ପାଇଁ ନିୟୋଜିତ ହୋଇଛନ୍ତି ଆମ ସେନା । ସେଥିପାଇଁ ତ ନିଶ୍ଚିନ୍ତ ହୋଇ ଆମେ ଶୋଇ ପାରୁଛୁ । ଆଜି 47ତମ ଭାରତୀୟ ତଟରକ୍ଷୀ ଦିବସ ପାଳନ କରୁଛି ଦେଶ । ଜଳ ପଥରେ ଶତ୍ରୁକୁ ମାତ ଦେବାକୁ ସଜାଗ ଆମ ସେନା । ସମୁଦ୍ର ପଥକୁ ସୁରକ୍ଷା ଦେବାକୁ ଆପ୍ରାଣ ଉଦ୍ୟମ କରୁଛନ୍ତି । ସେମାନଙ୍କ ସେବା ସମ୍ପର୍କରେ ସେଚେତନତା ସୃଷ୍ଟି ପାଇଁ ପ୍ରତିବର୍ଷ ଫେବୃଆରୀ 1 ତାରିଖକୁ ଭାରତୀୟ ତଟରକ୍ଷୀ ବାହିନୀ ଦିବସ ଭାବେ ପାଳନ କରାଯାଏ ।
ଭାରତୀୟ ତଟରକ୍ଷୀ ଦିବସରେ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଟ୍ବିଟ କରି ପ୍ରଧାନମନ୍ତ୍ରୀ କହିଛନ୍ତି, ସମସ୍ତ କୋଷ୍ଟଗାର୍ଡ ଅଧିକାରୀଙ୍କୁ ଏହି ଦିବସରେ ଶୁଭେଚ୍ଛା । ଇଣ୍ଡିଆନ୍ କୋଷ୍ଟଗାର୍ଡ ଏହାର ବୃତ୍ତିଗତତା ଏବଂ ଆମର ଉପକୂଳକୁ ସୁରକ୍ଷିତ ରଖିବା ପାଇଁ ପ୍ରୟାସ ପାଇଁ ଜଣାଶୁଣା । ସେମାନଙ୍କର ଭବିଷ୍ୟତ ପ୍ରୟାସ ପାଇଁ ସେମାନଙ୍କୁ ମୋର ଶୁଭେଚ୍ଛା ।