ଶ୍ରୀନଗର: ପ୍ରବଳ ତୁଷାରପାତ ସମୟରେ ଦେବଦୂତ ସାଜିଲେ ଯବାନ । ଗର୍ଭବତୀଙ୍କ ଜୀବନ ରକ୍ଷା କଲେ ଭାରତୀୟ ସେନାର ଯବାନ । ଗର୍ଭବତୀ ମହିଳାଙ୍କ ବିପଦପୂର୍ଣ୍ଣ ଅବସ୍ଥା ମଧ୍ୟରେ ଜରୁରୀକାଳୀନ ଉଦ୍ଧାର କରିବା ସହ ମେଡିକାଲରେ ଭର୍ତ୍ତି କରିଛନ୍ତି ।
ଗତକାଲି ରାତିରେ(ଜାନୁଆରୀ ୧୧), ଭାରତ ସେନା ଏକ ଗର୍ଭବତୀଙ୍କୁ ବିପଦପୂର୍ଣ୍ଣ ଅବସ୍ଥାରେ ଉଦ୍ଧାର କରିଥିଲେ । କାଲାରୋସ୍ ବ୍ଲକର ସାର୍କୁଲି ଗ୍ରାମରେ ଏପରି ଘଟଣା ଦେଖିବାକୁ ମିଳିଛି । ପ୍ରବଳ ତୁଷାରପାତ ଏବଂ ବିପଦପୂର୍ଣ୍ଣ ରାସ୍ତାରୁ ବଶିର ଅହମ୍ମଦ ମୁଗଲଙ୍କ ପତ୍ନୀ ମରିୟମ ବେଗମ୍କୁ ଉଦ୍ଧାର କରିଥିଲା ସେନା । ଅଚାନକ ଭାବେ ମରିୟମଙ୍କ ପ୍ରସବ ଯନ୍ତ୍ରଣା ଅନୁଭବ କରିବାରୁ ପରିବାର ଲୋକେ ସ୍ଥାନୀୟ ଅଞ୍ଚଳର ଟ୍ରାଭେଲର୍ସ ଏବଂ ବ୍ୟକ୍ତିଗତ ଯାନ ଥିବା ଲୋକଙ୍କୁ ସହାୟତା ମାଗିଥିଲେ । ମାତ୍ର କିନ୍ତୁ କମ୍ ଭିଜିବିଲିଟି ଅବସ୍ଥାରେ ଗାଡିଗୁଡିକ ଖାଇରୁ ଖସିଯିବାର ସମ୍ଭାବନା ଥିବାରୁ କୌଣସି ବ୍ୟକ୍ତି ସହାୟତା କରିପାରିବେନି ବୋଲି ମନା କରିଥିଲେ ।
ଉପାୟ ଶୂନ୍ୟ ହୋଇ ପରିବାରବର୍ଗ ରାତି ୮.୩୦ ସମୟରେ ଭାରତୀୟ ସେନା ପାଖକୁ , ଫୋନ କଲ୍ କରିଥିଲେ । କଲ୍ରେ ଗୁରୁତର ଅବସ୍ଥାରେ ଥିବା ଜଣେ ଗର୍ଭବତୀଙ୍କୁ ତୁରନ୍ତ ଉଦ୍ଧାର ଏବଂ ଚିକିତ୍ସା ପାଇଁ ମେଡିକାଲ୍ରେ ଭର୍ତ୍ତି କରାଇବାକୁ ଅନୁରୋଧ କରାଯାଇଥିଲା । ପ୍ରବଳ ତୁଷାରପାତ ଯୋଗୁଁ ରାସ୍ତାଗୁଡ଼ିକ ପ୍ରାୟ ସମ୍ପୂର୍ଣ୍ଣ ବନ୍ଦ ସହ ଖସଡ଼ା ସଦୃଶ ରହିଥିଲା । କିନ୍ତୁ ପ୍ରବଳ ତୁଷାରପାତକୁ ଖାତିର ନକରି ଗର୍ଭବତୀଙ୍କୁ ଉଦ୍ଧାର କରିବା ପାଇଁ ସଙ୍ଗେସଙ୍ଗେ ଯବାନ ବାହାରିଥିଲେ ।