ଶ୍ରୀନଗର: ଦକ୍ଷିଣ ଜମ୍ମୁକାଶ୍ମୀରର ଅନନ୍ତନାଗ ଅଞ୍ଚଳରେ ଯବାନମାନେ ଭିନ୍ନକ୍ଷମଙ୍କ ଚିକିତ୍ସା ଲାଗି ନେଇଛନ୍ତି ଏକ ପ୍ରଶଂସନୀୟ ପଦକ୍ଷେପ । ପୁଣେର ଏକ ଏନଜିଓ ସଂସ୍ଥା ଓ ସ୍ଥାନୀୟ ଅଞ୍ଚଳର ଭିନ୍ନକ୍ଷମ ବ୍ୟକ୍ତି ସଙ୍ଗଠନର ମିଳିତ ଉଦ୍ୟମରେ ଯବାନମାନେ ଏକ ମେଡିକାଲ କ୍ୟାମ୍ପର ଆୟୋଜନ କରି ଭିନ୍ନକ୍ଷମଙ୍କୁ ମାଗଣା ଚିକିତ୍ସା ଓ ଉପକରଣ ଯୋଗାଇଛନ୍ତି ।
ଏହି ମେଡିକାଲ କ୍ୟାମ୍ପରେ କୁଲଗାମ, ସୋପିଆନ, ପୁଲୱାମା ଓ ଅନନ୍ତନାଗ ଜିଲ୍ଲାରୁ ପ୍ରାୟ 250ଟି ହ୍ବିଲଚେୟାର, 150ଟି ଆଶାବାଡି, 230ଟି ଶ୍ରବଣ ଉପକରଣ, 200ଟି ଚାଲିବାରେ ସହଯୋଗ କରୁଥିବା ବାଡି ଆଦି ଉପକରଣଗୁଡିକୁ ଭିନ୍ନକ୍ଷମବ୍ୟକ୍ତିଙ୍କୁ ଯୋଗାଇଛନ୍ତି । ଭିନ୍ନକ୍ଷମ ହିତାଧିକାରୀଙ୍କ ତାଲିକା ଅନନ୍ତନାଗ ଶାଖାର ଭିନ୍ନକ୍ଷମ ବ୍ୟକ୍ତି ସଙ୍ଗଠନ ଦ୍ବାରା ପ୍ରସ୍ତୁତ କରାଯାଇଥିଲା । ଏହି ଉପକରଣଗୁଡିକ ପାଇବା ଦ୍ବାରା ସେମାନଙ୍କ ଜୀବନଶୈଳୀ କିଛି ମାତ୍ରାରେ ସହଜ ହୋଇପାରିଛି ବୋଲି ଭିନ୍ନକ୍ଷମ ବ୍ୟକ୍ତିମାନେ କହିଛନ୍ତି ।