ହାଇଦ୍ରାବାଦ: କମୁଛି ଚୀନର ଜନସଂଖ୍ୟା । ପୃଥିବୀର ସର୍ବବୃହତ୍ତ ଜନବହୁଳ ରାଷ୍ଟ୍ର ଅଭିମୁଖେ ଭାରତ । ୱାର୍ଲ୍ଡ ପପୁଲେସନ ରିଭ୍ୟୁ ଆନୁଯାୟୀ, "୨୦୨୨ ଶେଷ ସୁଦ୍ଧା ଭାରତର ଜନସଂଖ୍ୟା ୧୪୧.୭ କୋଟି ରହିଛି । ଅନ୍ୟପଟେ ଜାନୁଆରୀ ୧୭ ,୨୦୨୩ରେ ଚୀନ ଦ୍ବାରା ପ୍ରକାଶିତ ରିପୋର୍ଟ ଆନୁଯାୟୀ ଚୀନର ଜନସଂଖ୍ୟା ୧୪୧.୨ କୋଟି ରହିଛି । ଯାହା ଭାରତର ଜନସଂଖ୍ୟା ଠାରୁ ୫୦ ଲକ୍ଷ କମ ରହିଛି । ୬୦ ବର୍ଷରେ ପ୍ରଥମ ଥର ଲାଗି ଚୀନର ଜନସଂଖ୍ୟା ଆନୁପାତିକ ଭାବରେ ହ୍ରାସ ପାଇଛି । ୧୯୬୧ ମସିହା ପରଠାରୁ ପ୍ରଥମ ଥର ପାଇଁ ବିଶ୍ୱର ସବୁଠୁ ଜନବହୁଳ ରାଷ୍ଟ୍ର ଚୀନର ଲୋକସଂଖ୍ୟା ହାର କମିଛି । ଚୀନର ଜନସଂଖ୍ୟା ହ୍ରାସକୁ ନେଇ ଚୀନ ସରକାର ଚିନ୍ତା ପ୍ରକଟ କରିଛି ।
ଚୀନ ସରକାର ଦ୍ବାରା ପ୍ରକାଶିତ ତଥ୍ୟ ରିପୋର୍ଟ ଅନୁଯାୟୀ, "ଚୀନ ଜନସଂଖ୍ୟା ୧.୪୧୨ ବିଲିୟନରୁ ଗତବର୍ଷ ୧.୪୧୧ ବିଲିୟନ ଖସିଥିବା ନ୍ୟାସନାଲ୍ ଷ୍ଟାଷ୍ଟିକ୍ସ୍ ବ୍ୟୁରୋ ପକ୍ଷରୁ ମଙ୍ଗଳବାର କୁହାଯାଇଛି । ରିପୋର୍ଟ ଅନୁସାରେ, ଦେଶରେ ପାଖାପାଖି ୮୫ ଲକ୍ଷ ଜନସଂଖ୍ୟା କମିଛି।" ଗତବର୍ଷ ଚାଇନାରେ ଜନସଂଖ୍ୟା ହାର ପ୍ରତି ୧୦୦୦ରେ ୬.୭୭ ଥିବାବେଳେ ତା'ପୂର୍ବ ବର୍ଷ ଅର୍ଥାତ୍ ୨୦୨୧ରେ ଏହା ୭.୫୨ ଥିଲା । ଅନ୍ୟପକ୍ଷରେ ଦେଶରେ ମୃତ୍ୟୁହାର ବୃଦ୍ଧି ପାଇଛି । ୨୦୨୨ରେ ଚୀନର ମୃତ୍ୟୁହାର ପ୍ରତି ୧୦୦୦ରେ ୭.୬୭ ହୋଇଛି, ଯାହା ୨୦୨୧ରେ ୭.୧୮ ଥିଲା ।
ନ୍ୟାସନାଲ୍ ଷ୍ଟାଷ୍ଟିକ୍ସ୍ ବ୍ୟୁରୋ ଅନୁଯାୟୀ, ୨୦୨୨ ମସିହାରେ ଚୀନର ମୋଟ ଘରୋଇ ଉତ୍ପାଦ ୧.୨୧୦ ବିଲିୟନ ୟୁଆନରେ ପହଞ୍ଚିଛି । ଯାହା ୨୦୨୧ରେ ୧.୧୪୩ ବିଲିୟନ ୟୁଆନ ଥିଲା । ରିପୋର୍ଟ ଅନୁଯାୟୀ, ଚୀନର ଜିଡିପି ଅଭିବୃଦ୍ଧି ହାର ସରକାରୀ ଲକ୍ଷ୍ୟଠାରୁ ୫.୫ ପ୍ରତିଶତ ତଳେ ରହିଛି । ଏଥିସହିତ ସରକାର କହିଛନ୍ତି ଯେ ବର୍ତ୍ତମାନର ସଂକ୍ରମଣର ଲହର ଅତିକ୍ରମ କରିସାରିଛି । ଶୂନ କୋଭିଡ ନୀତି ଏବଂ ରିଅଲ ଇଷ୍ଟେଟ ବଜାରରେ ବ୍ୟାପକ ହ୍ରାସ ଯୋଗୁଁ ୨୦୨୨ ମସିହାରେ ଚାଇନା ଅର୍ଥନୀତିର ଗତି ମାତ୍ର ତିନି ପ୍ରତିଶତକୁ ଖସି ଆସିଛି । ୧୯୪୭ ପରେ ଗତ ୫୦ ବର୍ଷ ମଧ୍ୟରେ ଏହା ହେଉଛି ଚୀନର ଦ୍ୱିତୀୟ ସର୍ବନିମ୍ନ ଜିଡିପି ଅଭିବୃଦ୍ଧି ହାର । ସେହି ସମୟରେ ଆର୍ଥିକ ଅଭିବୃଦ୍ଧି ହାର ୨.୩ ପ୍ରତିଶତ ଥିଲା । ଫଳରେ ଚୀନର ଅର୍ଥନୀତି ଟଳମଳ ହେବାରେ ଲାଗିଛି ।
ନିତ୍ୟବ୍ୟବହାର୍ଯ୍ୟ ଜିନିଷର ମୂଲ୍ୟ ବୃଦ୍ଧି ସାଙ୍ଗକୁ ଘରଭଡ଼ା, ସ୍କୁଲ ଫି' ଆଦି ଦର ବଢ଼ିବା ଯୋଗୁ ଲୋକମାନେ ଏକାଧିକ ବଦଳରେ ଗୋଟିଏ ଶିଶୁ ଜନ୍ମ କରିବାକୁ ପସନ୍ଦ କରୁଛନ୍ତି । ନ୍ୟାସନାଲ୍ ଷ୍ଟାଷ୍ଟିକ୍ସ୍ ବ୍ୟୁରୋର ମୁଖ୍ୟ କାଙ୍ଗ ୟି କହିଛନ୍ତି, "ଦେଶରେ ଚାହିଦାଠାରୁ ଅଧିକ ଶ୍ରମିକ ଥିବାଯୋଗୁଁ ଲୋକସଂଖ୍ୟା ହ୍ରାସକୁ ନେଇ ଚୀନ ଲୋକେ ବ୍ୟସ୍ତ ହେବା ଅନାବଶ୍ୟକ ।" ଏହାପୂର୍ବରୁ ୧୯୪୭ ମସିହାରେ ଚୀନର ଅଭିବୃଦ୍ଧି ହାର ୨.୩ ପ୍ରତିଶତ ଥିଲା । ଏଠାରେ ଉଲ୍ଲେଖଯୋଗ୍ୟ ଯେ, ଚଳିତ ବର୍ଷ ଚୀନ ଜିଡିପି ହାର ୨୦୨୧ ମସିହାରେ ୧୮,୦୦୦ ବିଲିୟନ ଡ଼ଲାରରୁ ୧୭,୯୪୦ ବିଲିୟନ ଡ଼ଲାରକୁ ଖସି ଆସିଛି। ଚୀନର ମୁଦ୍ରା ବିରୋଧରେ ଡଲାର ମଜଭୁତ ଯୋଗୁଁ ଏଭଳି ସ୍ଥିତି ଦେଖା ଦେଇଛି ।
