ମେଲ: ଭାରତ ସର୍ବଦା ମାଳଦ୍ବୀପର ଏକ ବିଶ୍ବସ୍ତ ସୁରକ୍ଷା ସହଯୋଗୀ ରହିବ ବୋଲି ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ରବିବାର କହିଛନ୍ତି । ତେବେ ମାଳଦ୍ବୀପର ସାମୁଦ୍ରିକ କ୍ଷମତା ବୃଦ୍ଧି ପାଇଁ ଭାରତ 50 ମିଲିୟନ ଡଲାରର ପ୍ରତିରକ୍ଷା LoC ବା ଲାଇନ ଅଫ୍ କ୍ରେଡିଟ(ବ୍ୟାଙ୍କ ତରଫରୁ ସରକାରଙ୍କ ପାଇଁ ଏକ କ୍ରେଡିଟ ସୁବିଧା) ଚୁକ୍ତିନାମା ସ୍ବାକ୍ଷର କରାଯିବା ସମୟରେ ଜୟଶଙ୍କର ଏହି ମନ୍ତବ୍ୟ ଦେଇଛନ୍ତି ।
ମନ୍ତ୍ରୀ ଜୟଶଙ୍କର ମାଳଦ୍ବୀପର ପ୍ରତିରକ୍ଷା ମନ୍ତ୍ରୀ ମାରିୟା ଡିଡିଙ୍କ ସହିତ ଆଲୋଚନା କରିବା ପାଇଁ 2 ଦିନିଆ ମାଳଦ୍ବୀପ ଗସ୍ତରେ ରହିଛନ୍ତି । ତେବେ ଏ ସମ୍ପର୍କରେ କେନ୍ଦ୍ରମନ୍ତ୍ରୀ ଜୟଶଙ୍କର ଟ୍ବିଟ କରି କହିଛନ୍ତି ଯେ ପ୍ରତିରକ୍ଷାମନ୍ତ୍ରୀ ମାରିୟା ଡିଡିଙ୍କ ସହିତ ଏକ ସଫଳ ବୈଠକ ହୋଇଛି । ଆମର ପ୍ରତିରକ୍ଷା ସହଯୋଗରେ ଉପଯୋଗୀ ବିନିମୟ ହୋଇଛି । ଭାରତ ସର୍ବଦା ମାଲଦ୍ବୀପ ପାଇଁ ଏକ ନିର୍ଭରଯୋଗ୍ୟ ସୁରକ୍ଷା ସହଯୋଗୀ ରହିବ ବୋଲି ସେ ଟ୍ବିଟ ମାଧ୍ୟମରେ ସୂଚନା ଦେଇଛନ୍ତି ।