India Corona: ବଢିଲା କୋରୋନା ସଂକ୍ରମଣ, ଦିନକରେ ୧୦,୫୪୨ ନୂଆ ସଂକ୍ରମିତ

ଦେଶରେ ପୁଣି ବଢିଲା କୋରୋନା ସଂକ୍ରମଣ । ଗତ ୨୪ ଘଣ୍ଟାରେ ୧୦ ହଜାର ୫୪୨ ଜଣ ନୂଆ ସଂକ୍ରମିତ ଚିହ୍ନଟ । ଅଧିକ ପଢନ୍ତୁ

ନୂଆଦିଲ୍ଲୀ:ଦେଶରେ ପୁଣି ଉପରମୁହାଁ କୋରୋନା ଗ୍ରାଫ୍ । ବଢୁଛି ଦୈନିକ ସଂକ୍ରମଣ । ଦୁଇ ଦିନର ହ୍ରାସ ପରେ ପୁଣିଥରେ ସଂକ୍ରମଣ ମାମଲାର ୧୦ ହଜାର ଅତିକ୍ରମ କରିଛି । ଗତ ୨୪ ଘଣ୍ଟା ମଧ୍ୟରେ ଦେଶରେ ୧୦ ହଜାର ୫୪୨ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ଏହାକୁ ମିଶାଇ ସମୁଦାୟ ଆକ୍ଟିଭ କୋରୋନା ମାମଲା ୬୩ ହଜାର ୫୬୨କୁ ବୃଦ୍ଧି ପାଇଛି । ସେହିପରି ଦିନକରେ ୩୮ ଆକ୍ରାନ୍ତଙ୍କ ମୃତ୍ୟୁ ଘଟିଛି । ଫଳରେ ଦେଶରେ ମୋଟ କୋରୋନା ଜନିତ ମୃତ୍ୟୁ ସଂଖ୍ୟା ୫ ଲକ୍ଷ ୩୧ ହଜାର ୧୯୦ରେ ପହଞ୍ଚିଛି । ଏନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ।

ସ୍ବାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁସାରେ, କୋରୋନା ଆରମ୍ଭରୁ ଏବେ ସୁଦ୍ଧା ଦେଶରେ ୪,୪୮,୪୫,୪୦୧ ଲୋକ ସଂକ୍ରମିତ ହୋଇଛନ୍ତି । ଦେଶରେ ଦୈନିକ ପଜିଟିଭ ରେଟ୍ ୪.୩୯ ପ୍ରତିଶତ ରହିଛି । ସାପ୍ତାହିକ ପଜିଟିଭି ରେଟ ୫.୧ ପ୍ରତିଶତ ଅଛି । ସେହିପରି ଦେଶରେ ସୁସ୍ଥତା ହାର ୯୮.୬୭ ପ୍ରତିଶତ ରହିଛି । କିଛି ଦିନ ହେଲା ସଂକ୍ରମଣ ବୃଦ୍ଧ ପରେ ଏବେ ଭାରତରେ ୬୩,୫୬୨ଟି ଆକ୍ଟିଭ ମାମଲା ରହିଛି । ତେବେ ଦେଶବ୍ୟାପୀ ଟୀକାକରଣ ଜାରି ରହିଛି । ମନ୍ତ୍ରଣାଳୟର ୱେବସାଇଟ ଅନୁଯାୟୀ, ସାରା ଦେଶରେ ଆଜି ପର୍ଯ୍ୟନ୍ତ କୋରୋନା ଟିକାର ୨୨୦.୬୬ ଡୋଜ ଦିଆଯାଇଛି ।

ଦୀର୍ଘ ଦିନର ବ୍ୟବଧାନ ପରେ ଦେଶରେ ପୁଣିଥରେ କୋରୋନା କାୟା ମେଳାଉଛି । ଗତକାଲି ସଂକ୍ରମଣ ୮ ହଜାର ତଳେ ଥିବାବେଳେ ଆଜି ପୁଣିଥରେ ୧୦ ହଜାର ପାର୍ କରିଛି । ଦୈନିକ ସଂକ୍ରମଣ ବଢୁଥିବାରୁ କିଛି ରାଜ୍ୟରେ କୋରୋନା କଟକଣା ଫେରିଛି । ହରିୟାଣା, କେରଳ ଓ ପୁଡୁଚେରୀରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି ।

ସର୍ବସାଧାରଣ ସ୍ଥାନାକୁ ମାସ୍କ ପିନ୍ଧି ଯିବାକୁ ହରିୟାଣା ସରକାର ନିର୍ଦ୍ଦେଶ ଦେଇଛନ୍ତି । ସରକାରୀ, ବେସରକାରୀ ଅଫିସ ଓ ସପିଂ ମଲରେ ମାସ୍କ ବ୍ୟବହାର କରିବାକୁ କୁହାଯାଇଛି । ପଶ୍ଚିମବଙ୍ଗ ସରକାର କୋରୋନା ଗାଇଡଲାଇନ ଜାରି କରିଛନ୍ତି । ଏଥିରେ ବୟସ୍କ, ଶିଶୁ ଓ ଗର୍ଭବତୀ ମହିଳାଙ୍କୁ ସମାବେଶରେ ହେବାକୁ ବାରଣ କରାଯାଇଛି ।