ହାଇଦ୍ରାବାଦ:ଜାନୁଆରୀ 12 ତାରିଖରୁ ଆରମ୍ଭ ହେବାକୁ ଯାଉଛି ଭାରତ ଏବଂ ଜାପାନ ମିଳିତ ବାୟୁ ଅଭ୍ୟାସ (India Japan joint exercise)। ଦୁଇ ଦେଶ ମଧ୍ୟରେ ହେବାକୁ ଥିବା ଏହି ମିଳିତ ଅଭ୍ୟାସ 12ରେ ଆରମ୍ଭ ହୋଇ 26 ତାରିଖରେ ଶେଷ ହେବ । ଜାପାନର ହାଇକୁରି ଏୟାର ବେସରେ ଅନୁଷ୍ଠିତ ହେବାକୁ ଥିବା ଏହି ଅଭ୍ୟାସରେ ଭାରତୀୟ ବାୟୁସେନା ଅଂଶଗ୍ରହଣ କରିବା ପାଇଁ ଜାପାନ ଯିବ । ଭାରତୀୟ ବାୟୁସେନା (IAF) ଏବଂ ଜାପାନ ଏୟାର ସେଲ୍ଫ ଡିଫେନ୍ସ ଫୋର୍ସ (JASDF) ମଧ୍ୟରେ ହେବାକୁ ଥିବା ଏହି ମିଳିତ ସମରାଭ୍ୟାସର ନାମ ରଖାଯାଇଛି 'ବୀର ଗାର୍ଡିଆନ -2023' (Veer Guardian-2023) ।
ଏହି ମିଳିତ ବାୟୁ ସମରାଭ୍ୟାସରେ ଅଂଶଗ୍ରହଣ କରିବା ପାଇଁ ଭାରତୀୟ ବାୟୁସେନାର କଣ୍ଟିଜେଣ୍ଟ ପ୍ରସ୍ତୁତ ହୋଇସାରିଛି (India Japan joint exercise)। ଏଥିରେ ସ୍ବତନ୍ତ୍ର ଭାବେ ଚୟନ ହୋଇଥିବା ବାୟୁବୀରଙ୍କ ସହ ଏକାଧିକ ଲଢୁଆ ବିମାନ ଅଂଶଗ୍ରହଣ କରିବା ପାଇଁ ଜାପାନରେ ପହଞ୍ଚିବା ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ଚାରିଟି ସୁଖୋଇ-30 (Su-30 MKI), ଦୁଇଟି C-17 ଏବଂ ଗୋଟିଏ IL-78 ବିମାନ ଅଂଶଗ୍ରହଣ କରିବେ ବୋଲି ଭାରତୀୟ ବାୟୁସେନା ପକ୍ଷରୁ ସୂଚନା ମିଳିଛି । ସେହିପରି ଜାପାନ ବାୟୁସେନା (JASDF) ଚାରିଟି F-2 ଏବଂ ଚାରିଟି F-15 ବିମାନ ଅଭ୍ୟାସରେ ଅଂଶଗ୍ରହଣ କରିବେ ।