ନୂଆଦିଲ୍ଲୀ:ଆଫଗାନିସ୍ତାନରୁ ସମସ୍ତ ଭାରତୀୟଙ୍କୁ ସୁରକ୍ଷିତ ଭାବରେ ଉଦ୍ଧାର କରିବା ପାଇଁ ବଦ୍ଧପରିକର ଭାରତ ସରକାର । ଆଫାଗାନିସ୍ତାନର କାବୁଲରୁ ୮୭ ଜଣ ଭାରତୀୟ ତାଜାକିସ୍ତାନ ଦେଇ ସୁରକ୍ଷିତ ଭାବରେ ଭାରତରେ ପହଞ୍ଚିବା ପରେ ଏହା କହିଛନ୍ତି ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ।
କେନ୍ଦ୍ରମନ୍ତ୍ରୀ ଟ୍ବିଟ କରି କହିଛନ୍ତି ଯେ ତାଜାକିସ୍ତାନର ରାଜଧାନୀ ଦୁସାନୋବେରୁ ଏୟାର ଇଣ୍ଡିଆ ଏୟାରକ୍ରାପ୍ଟ ୮୭ ଜଣ ଭାରତୀୟଙ୍କୁ ନୂଆଦିଲ୍ଲୀ ପହଞ୍ଚାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୃଢ ନେତୃତ୍ବରେ ଆଫଗାନିସ୍ତାନରୁ ସମସ୍ତ ଭାରତୀୟଙ୍କୁ ସୁରକ୍ଷିତ ଭାବରେ ଫେରାଇଆଣିବା ପାଇଁ ବଦ୍ଧପରିକର ବୋଲି କହିଛନ୍ତି। ଏହା ସହ ଭାରତୀୟମାନେ ଆଫଗାନିସ୍ତାନରୁ ଫେରିବାବେଳେ ଭାରତ ମାତା କି ଜୟ ନାରା ଦେଉଥିବା ଭିଡିଓ ମଧ୍ୟ ଟ୍ବିଟ କରିଛନ୍ତି। ଭାରତ ବର୍ତ୍ତମାନ ପର୍ଯ୍ୟନ୍ତ ଦୂତାବାସ କର୍ମଚାରୀ ସମେତ ଆଫଗାନିସ୍ତାନରୁ ୩୦୦ ରୁ ଅଧିକ ଲୋକଙ୍କୁ ଉଦ୍ଧାର କରିଛି । ଭାରତ ତାଜାକିସ୍ତାନ ଓ କାତାର ରୁଟରୁ ସମସ୍ତଙ୍କୁ ଉଦ୍ଧାର କରୁଛି । ଆଫଗାନିସ୍ତାନରୁ ସମସ୍ତ ଭାରତୀୟ ନାଗରିକଙ୍କ ନିରାପଦ ପ୍ରତ୍ୟାବର୍ତ୍ତନ ପାଇଁ ସରକାର ପ୍ରତିବଦ୍ଧ ବୋଲି ସେ କହିଛନ୍ତି।