ନୂଆଦିଲ୍ଲୀ: ୟୁକ୍ରେନରେ ଦେଖାଯାଇଥିବା ଯୁଦ୍ଧ ପରିସ୍ଥିତିରେ ଭାରତୀୟଙ୍କୁ ସୁରକ୍ଷିତ ଉଦ୍ଧାର ପାଇଁ ଜାରି ରହିଛି ଅପରେସନ ଗଙ୍ଗା । ତେବେ ସେଠାରୁ ଉଡାଣ ଭରୁଥିବା ବିମାନକୁ ପାକିସ୍ତାନ ଆକାଶ ମାର୍ଗରେ ଭାରତକୁ ଉଡାଣ ପାଇଁ ପାକିସ୍ତାନକୁ ସାମୟିକ ଅନୁମତି ମାଗିବା ପ୍ରସ୍ତାବ ଉଠିଥିଲେ ସୁଦ୍ଧା ଭାରତ ପକ୍ଷରୁ ଏପରି ପ୍ରସ୍ତାବକୁ ଏଡାଇ ଦିଆଯାଇଛି ।
ପାକିସ୍ତାନ ଓ ଭାରତ ମଧ୍ୟରେ ବର୍ତ୍ତମାନ ମଧ୍ୟ ବୁଝାମଣା ଠିକ ହୋଇ ନଥିବାରୁ ସମ୍ପର୍କରେ ମଧ୍ୟ ସେତେଟା ସୁଧାର ଆସିନାହିଁ । ତେଣୁ ଭାରତ ପଡୋଶୀ ରାଷ୍ଟ୍ରକୁ କୌଣସି ସହାୟତା ମାଗିବା ଉଚିତ ମନେ କରିନାହିଁ । ଗତ ମଙ୍ଗଳବାର ରାତିରେ ସାଉଥ୍ ବ୍ଲକରେ ସର୍ବୋଚ୍ଚ ସ୍ତରରେ ଏହି ପ୍ରସ୍ତାବ ଉପରେ ଆଲୋଚନା ହୋଇଥିବା ବେଳେ ଏହାକୁ ବୈଠକରେ ସମ୍ପୂର୍ଣ୍ଣ ଏଡାଇ ଦିଆଯାଇଛି ।