ଗୌହାଟୀ: ଦୀର୍ଘ ଅଢ଼େଇ ବର୍ଷ ପରେ ପର୍ଯ୍ୟଟକଙ୍କ ପାଇଁ ଖୋଲିଲା ଆସାମରେ ଥିବା ଭାରତ-ଭୁଟାନ ସୀମା । କୋରୋନା ମହାମାରୀ ପାଇଁ ସୀମାର ଫାଟକ ବନ୍ଦ ରହିଥିଲା । ନୂତନ ନିୟମ ଏବଂ ଗାଇଡଲାଇନ ସହ ଶୁକ୍ରବାର ପର୍ଯ୍ୟଟକଙ୍କ ପାଇଁ ଏହା ଖୋଲାଯାଇଛି । ଏନେଇ ଆଜି ସରକାରୀ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି ।
ତାମୁଲପୁର ଜିଲ୍ଲାର ସମଦ୍ରୁପ-ଜୋଙ୍ଗଖର, ଦାଦଗିରି, ଚିରାଙ୍ଗର ଗେଲେଫୁ, ନମଲଙ୍ଗ, ବିସ୍କାର ପାନବ୍ୟଙ୍ଗ ଏବଂ ଉଦଲଗିରି ଜିଲ୍ଲାର ସମରଙ୍ଗରେ ଥିବା ଅନ୍ତର୍ଜାତୀୟ ସାମୀକୁ ଖୋଲାଯାଇଥିବା ଗୌହାଟୀର ଭୁଟାନ କନସଲ ଜେନେରାଲ ଘୋଷଣା କରିଛନ୍ତି । ସକାଳ ୯ରୁ ସନ୍ଧ୍ୟା ୫ ଯାଏ ପର୍ଯ୍ୟଟକଙ୍କ ପାଇଁ ସୀମା ଫାଟକ ଖୋଲା ରହିବ । ଏହି ପରିପ୍ରେକ୍ଷୀରେ ଆୟୋଜିତ ଉତ୍ସବରେ, ପର୍ଯ୍ୟଟକ, ଉଭୟ ଦେଶର ନାଗରିକ ତଥା ବ୍ୟକ୍ତି ବିଶେଷ ଯୋଗ ଦେଇଥିଲେ । ବାଣିଜ୍ୟ ଏବଂ ଗମନାଗମନ ପାଇଁ ଭୁଟାନ ସରକାର ସେପ୍ଟେମ୍ବର ୨୩ତାରିଖରେ ଖୋଲିବାକୁ ଘୋଷଣା କରିଥିଲେ । ଭୁଟାନ ପର୍ଯ୍ୟଟନ ବିଭାଗ ଏହି ଅଞ୍ଚଳ ଗୁଡ଼ିକର ସ୍ଥାୟୀ ବିକାଶ କରିବା ପାଇଁ ଶୁଳ୍କ ଲଗାଇଛି ।