ଚେନ୍ନାଇ:ତାମିଲନାଡୁରେ ଲଗାତାର ବର୍ଷା କିଛି ଦିନ ଧରି ଲାଗି ରହିଛି । ଫଳରେ ଚେନ୍ନାଇର ଅନେକ ଅଞ୍ଚଳ ପାଣି ଘେରରେ ରହିଥିବା ଦେଖିବାକୁ ମିଳିଛି । ତେବେ ଆସନ୍ତା ୨୪ ଘଣ୍ଟା ମଧ୍ୟ ବର୍ଷା ଜାରି ରହିବ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି ।
ଆସନ୍ତା ୨୪ ଘଣ୍ଟା ମଧ୍ୟରେ ତାମିଲନାଡୁ, ପୁଡୁଚେରୀ ଓ କରାଇକାଲ ଅଞ୍ଚଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଶ୍ରୀଲଙ୍କା ଉପକୂଳ ନିକଟବର୍ତ୍ତୀ ଦକ୍ଷିଣ ପୂର୍ବ ବଙ୍ଗୋପସାଗର ନିକଟରେ ଏକ ସାମୁଦ୍ରିକ ଝଡ଼ ସୃଷ୍ଟି ହୋଇଛି । ଫଳରେ ତାମିଲନାଡୁରେ ବର୍ଷା ଲାଗି ରହିଥିବା ବେଳେ ଆଉ ଏକ ଦିନ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି କହିଛି ପାଣିପାଗ ବିଭାଗ ।
ଗତ ଶୁକ୍ରବାର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ବନ୍ୟା ପ୍ରପୀଡ଼ିତ ଅଞ୍ଚଳର ସ୍ଥିତି ଅନୁଧ୍ୟାନ କରିଥିବା ବେଳେ ଖୁବଶୀଘ୍ର ସମସ୍ୟାର ସମାଧାନ କରାଯିବ ବୋଲି କହିଛନ୍ତି । ଏନେଇ ଷ୍ଟାଲିନ କହିଛନ୍ତି ଯେ, "ଶୁକ୍ରବାର ମଧ୍ୟରାତ୍ରିରେ ସେ ଚେନ୍ନାଇରୁ ତ୍ରିଚି ପହଞ୍ଚିବା ପରେ ବର୍ଷା ସ୍ଥିତି ଅନୁଧ୍ୟାନ କରିଥିଲେ । ଶନିବାର ସନ୍ଧ୍ୟା ସୁଦ୍ଧା ଚେନ୍ନାଇର ବିଭିନ୍ନ ଅଞ୍ଚଳରେ ଜମିଥିବା ପାଣିକୁ ନିଷ୍କାସନ କରାଯିବ ବୋଲି ସେ କହିଛନ୍ତି ।
ସେପଟେ ଏହି ଅଞ୍ଚଳ ଗୁଡ଼ିକରେ ଆଣ୍ଠୁଏ ପାଣି ରହିଥିବା ବେଳେ ଲୋକମାନେ ପାଣି ଭିତରେ ପଶି ଯାତାୟାତ କରୁଥିବା ଦେଖିବାକୁ ମିଳିଛି । ଜଳ ନିଷ୍କାସନ ପ୍ରକ୍ରିୟା ଜାରି ରହିଥିବା ବେଳେ କିଛି ରାସ୍ତାକୁ ବନ୍ଦ ରଖାଯାଇଛି । ଘର ଭିତରକୁ ପାଣି ନ ପଶିବା ପାଇଁ କିଛି ଲୋକେ ବାଲି ବସ୍ତା ଘର ସମ୍ମୁଖରେ ରଖିଥିବା ଦେଖିବାକୁ ମିଳିଛି ।
@ANI
