ନୂଆଦିଲ୍ଲୀ: ଆଜି ଭାରତୀୟ ନୌସେନା ଦିବସ(Idian Navy Day) । ଭାରତୀୟ ନୌସୈନିକଙ୍କ ବୀରତ୍ବକୁ ସମ୍ମାନ ଜଣାଇବା ଉଦ୍ଦେଶ୍ୟରେ ପ୍ରତିବର୍ଷ ଡିସେମ୍ବର ୪ ତାରିଖରେ ଏହି ଦିବସ ପାଳନ କରାଯାଏ । ଦେଶର ପ୍ରତିରକ୍ଷା କ୍ଷେତ୍ରରେ ନୌସେନା ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଛି । ସାଗର ତଟବର୍ତ୍ତୀରେ ଥିବା ସୀମାବର୍ତ୍ତୀ ଅଞ୍ଚଳରେ ନୌସୈନ୍ୟମାନେ ଦିନରାତି ସଜାଗ ରହି ଦେଶକୁ ଶତ୍ରୁ ମୁଖରୁ ରକ୍ଷା କରିଥାନ୍ତି । ଡିସେମ୍ବର ୩, ୧୯୭୧ ରେ ଭାରତ-ପାକିସ୍ତାନ ମଧ୍ୟରେ ହୋଇଥିବା ଘୋମାଘୋଟ ଯୁଦ୍ଧରେ ବୀରତ୍ବ ପ୍ରଦର୍ଶନ କରିଥିଲା ଭାରତୀୟ ନୌସେନା । ସେବେଠାରୁ ନୌସେନା ଦିବସ ପାଳନ କରାଯାଉଛି ।
ଭାରତ-ପାକିସ୍ତାନ ନୌସେନା ମଧ୍ୟରେ 1971 ମସିହା ଡିସେମ୍ବର ୩ ତାରିଖ ରାତିରେ ଭୀଷଣ ଯୁଦ୍ଧ ହୋଇଥିଲା । ଏଥିରେ ଭାରତୀୟ ନୌସେନା ପାକିସ୍ତାନରେ ଘାଟିଗୁଡିକ ଉପରେ ଆକ୍ରମଣ କରିଥିଲା । ସେତେବେଳେ ନିର୍ଘାତ, ବୀର ଓ ନିପାତ ନାମକ ୩ଟି କ୍ଷେପଣାସ୍ତ୍ର ସମ୍ବଳିତ ଜାହାଜକୁ ଦ୍ରୁତ ବେଗରେ କରାଚୀ ବନ୍ଦର ଅଭିମୁଖେ ନେଇଥିଲା ଭାରତୀୟ ନୌସେନା । ସେଠାରେ ନୌଜାହାଜଗୁଡିକ ପହଞ୍ଚି ଧ୍ବଂସଲୀଳା ରଚାଇଥିଲା । ଶେଷରେ ପାକିସ୍ତାନ ନୌସେନା ଭାରତ ସମ୍ମୁଖରେ ଆତ୍ମ ସମର୍ପଣ କରିଥିଲା ।
ଏହାପରଠୁ ଭାରତୀୟ ନୌସେନାର ଏହି ବଡ ବିଜୟକୁ ମନେ ପକାଇବା ସହ ନୌସୈନିକଙ୍କ ବୀରତ୍ବକୁ ସଲାମ କରିବା ଉଦ୍ଦେଶ୍ୟରେ ପ୍ରତିବର୍ଷ ଡିସେମ୍ବର 4 ତାରିଖରେ ନୌସେନା ଦିବସ ପାଳନ କରାଯାଉଛି ।