ଗୌହାଟି: ପତ୍ନୀଙ୍କ ବିରୋଧରେ କଂଗ୍ରେସ ଆଣିଥିବା ଦୁର୍ନୀତି ଅଭିଯୋଗ ନେଇ ଖପ୍ପା ହୋଇଛନ୍ତି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା । ଯଦି ତାଙ୍କ ସ୍ତ୍ରୀଙ୍କ ବିରୋଧରେ ଅଣାଯାଇଥିବା ଅଭିଯୋଗ ପ୍ରମାଣିତ ହୁଏ, ତେବେ ସେ ସାମାଜିକ ଜୀବନରୁ ଅବସର ନେଇଯିବେ ବୋଲି ବିଶ୍ବଶର୍ମା କହିବାକୁ ପଛାଇ ନାହାନ୍ତି । ବିଶ୍ବଶର୍ମାଙ୍କ ସ୍ତ୍ରୀ ରିଙ୍କି ଶର୍ମା ଭୂୟାଁଙ୍କ ଦ୍ବାରା ପରିଚାଳିତ ଏକ କମ୍ପାନୀ କେନ୍ଦ୍ରୀୟ ଯୋଜନା ଅଧୀନରେ 10 କୋଟି ଟଙ୍କାର ସବସିଡି ପାଇଥିବା ଅଭିଯୋଗ କରିଥିଲା କଂଗ୍ରେସ ।
କଂଗ୍ରେସ ସାଂସଦ ଗୌରବ ଗୋଗୋଇ ହିମନ୍ତଙ୍କ ପତ୍ନୀଙ୍କ ନିୟନ୍ତ୍ରଣାଧୀନ କମ୍ପାନୀ ଏହି କେନ୍ଦ୍ରୀୟ ସବସିଡି ପାଇଥିବା ଅଭିଯୋଗ କରିଥିଲେ । କେନ୍ଦ୍ରୀୟ ଯୋଜନା ‘ପ୍ରଧାନମନ୍ତ୍ରୀ କିଷାନ ସମ୍ପଦା ଯୋଜନା’ ମାଧ୍ୟମରେ ଏହି କମ୍ପାନୀ ପ୍ରାୟ 10କୋଟି ଟଙ୍କାର ସବସିଡି ଗ୍ରହଣ କରିଥିବା ଅଭିଯୋଗ କରି ଏକ୍ସରେ ଟ୍ବିଟ୍ କରିଥିଲେ ଗୌରବ । ସଂସଦରେ ପ୍ରଶ୍ନକାଳରେ ସଂଗୃହୀତ ହୋଇଥିବା ଏହି ସମ୍ପର୍କିତ କିଛି ଦଲିଲ୍ ମଧ୍ୟ ସେ ତାଙ୍କ ଟ୍ବିଟ୍ରେ ସଂଲଗ୍ନ କରିଥିଲେ । ଏଥିରେ ଏକ ମେଗା ଫୁଡ୍ପାର୍କ ସ୍କିମ୍ରେ ଆସାମର ଏକ କମ୍ପାନୀକୁ 10 କୋଟି ସବସିଡି ମିଳିବା ନେଇ ଉଲ୍ଲେଖ ରହିଛି । ହେଲେ ଏହି ରାଶି ଅନୁମୋଦିତ ହୋଇଥିଲେ ସୁଦ୍ଧା ଏବେ ସୁଦ୍ଧା ପ୍ରଦାନ କରାଯାଇନି । ଏହି କମ୍ପାନୀ ବିଶ୍ବଶର୍ମାଙ୍କ ପତ୍ନୀଙ୍କ ନିୟନ୍ତ୍ରଣରେ ଥିବା ଗୋଗୋଇ ଦର୍ଶାଇବାକୁ ଚାହିଁଛନ୍ତି । ସେହିପରି ଅନ୍ୟ କେତେ ଜଣେ ବିଜେପି ନେତା ଏହି କେନ୍ଦ୍ରୀୟ ଯୋଜନାର ଲାଭ ନେଇଛନ୍ତି ବୋଲି ମଧ୍ୟ ସାଂସଦ ଗୌରବ ପ୍ରଶ୍ନ କରିଥିଲେ ।