ସିମଲା: କୃଷକଙ୍କ ଆୟ ଦ୍ବିଗୁଣିତ କରିବା ଲାଗି ସରକାର ଅନେକ ପ୍ରତିଶୃତି ଦିଅନ୍ତି । ହେଲେ ବାସ୍ତବତାର ଚିତ୍ର କିଛି ଅଲଗା । ରୋଜଗାର ଯେତିକି ହେଉନି ତା'ଠୁ ପରିବହନ ଖର୍ଚ୍ଚ ଚାଷୀଙ୍କୁ ଚିନ୍ତାରେ ପକାଇଛି । ଜଣେ ଚାଷୀ ୨୫ ବସ୍ତା କୋବି ବିକ୍ରି କରି ୧୪୦୦ ଟଙ୍କା ରୋଜଗାର କରିଥିବା ବେଳେ ତା'ଠୁ ଅଧିକ ରହିଛି ପରିବହନ ଖର୍ଚ୍ଚ । ତାଙ୍କୁ ବଜାରରେ ପହଞ୍ଚିବା ଲାଗି ପଡୁଛି ଅଧିକ ୪୦୦ ଟଙ୍କା ଅର୍ଥାତ ୧୮୦୦ ଟଙ୍କା । ଫଳରେ ଚାଷୀ ଜଣକ ମୂଳ ଧନ ପାଇପାରିନାହାନ୍ତି । ହିମାଚଳପ୍ରଦେଶରେ ଏଭଳି ଘଟଣା ଦେଖିବାକୁ ମିଳିଛି ।
ଚାଷୀ ଜଣକ ୪୦୦ ଟଙ୍କା କ୍ଷତି ସହିଛନ୍ତି । ସୋଲନ ପରିବା ମଣ୍ଡିକୁ ଫୁଲକୋବି ନେଇ ଆସିଥିବା ଚାଷୀ ପ୍ରେମ କହିଛନ୍ତି ଯେ ସେ ୨୫ ବସ୍ତା ଫୁଲକୋବି ବିକ୍ରି କରିବା ଲାଗି ଆଣିଥିଲେ । ଯାହାକୁ ବିକ୍ରି କରି ସେ ୧୪୦୦ ଟଙ୍କା ରୋଜଗାର କରିଛନ୍ତି । ମାତ୍ର ମଣ୍ଡି ପହଞ୍ଚିବା ଲାଗି ସେ ଖର୍ଚ୍ଚ କରିଛନ୍ତି ୧୮୦୦ ଟଙ୍କା । ସେ ୧କେଜି କୋବିକୁ ଅଢେଇ ଟଙ୍କାରେ ବିକ୍ରି କରୁଥିବା ବେଳେ ଗୋଟିଏ ବସ୍ତାକୁ ୬୦ ଟଙ୍କାରେ ବିକ୍ରି କରୁଛନ୍ତି । କୋବି ଲଗାଇବା ଠାରୁ ଆରମ୍ଭ କରି ଫସଲ କାଟିବା, ଧୋଇବା ଓ ମଣ୍ଡି ନିକଟରେ ପହଞ୍ଚିବା ଲାଗି ଖର୍ଚ୍ଚ ହେଉଛି ୧୮୦୦ ଟଙ୍କା । ମାତ୍ର କୋବି ବିକ୍ରି କରି ସେ ରୋଜଗାର କରୁଛନ୍ତି ୧୪୦୦ ଟଙ୍କା । ଯାହାଦ୍ବାରା ସେ ମୂଳଧନ ପାଇପାରୁନଥିବା କହିଛନ୍ତି ।