ଚେନ୍ନାଇ: ପ୍ରଖର ବେଗରେ ସ୍ଥଳଭାଗ ଆଡକୁ ମାଡି ଆସୁଛି ବାତ୍ୟା 'ନିଭାର' । ବାତ୍ୟା ନିଭାର ପ୍ରଭାବରେ ବ୍ୟାପକ କ୍ଷୟକ୍ଷତିର ଅନୁମାନ କରିଛି ପାଣିପାଗ ବିଭାଗ । ପବନର ବେଗ ଘଣ୍ଟାପ୍ରତି 120ରୁ 130 କିଲୋମିଟର ରହିବ । କଚ୍ଚା ଘର ଭାଙ୍ଗିବା ସହ ଟେଲିଫୋନ ଖୁଣ୍ଟି ଉପୁଡିବ ବୋଲି ଆଶଙ୍କା ରହିଛି । ତେବେ ଏହାକୁ ଦୃଷ୍ଟିରେ ରଖି ବିପର୍ଯ୍ୟୟ ରିଲିଫ ସହ ଚେନ୍ନାଇ ସମୁଦ୍ର ଉପକୂଳରେ ମୁତୟନ ହୋଇଛି ନୌସେନା ଜାହାଜ ।
ବାତ୍ୟା ନିଭାର: ଅଶାନ୍ତ ସମୁଦ୍ର, ପ୍ରବଳ ବେଗରେ ବୁଛି ପବନ
ବାତ୍ୟା ନିଭାରକୁ ନେଇ ସୂଚନା ଦେଇଛନ୍ତି କେନ୍ଦ୍ର ପାଣିପାଗ ମହାନିର୍ଦେଶକ ଡଃ. ମୃତ୍ୟୁଞ୍ଜୟ ମହାପାତ୍ର । ପାଣିପାଗ ନିର୍ଦେଶକଙ୍କ ସୂଚନା ଅନୁଯାୟୀ ନିଭାର ପୁଡୁଚେରୀରୁ 250 କିଲୋମିଟର ଦୂରରେ ଅଛି । ଏହା ଉତ୍ତର ପଶ୍ଚିମ ଦିଗରେ ଗତି କରି ବୁଧବାର ମଧ୍ୟରାତ୍ରିରେ କରାଇକଲ ଓ ମାମଲ୍ଲପୁରମ ନିକଟରେ ସ୍ଥଳଭାଗ ଛୁଇଁବ । ଏହା ପ୍ରଭାବରେ 120ରୁ 130 କିଲୋମିଟର ବେଗରେ ପବନ ବହିବା ସହ ବ୍ୟାପକ କ୍ଷୟକ୍ଷତି ନେଇ ପୂର୍ବାନୁମାନ କରିଛି ପାଣିପାଗ ବିଭାଗ ।