ଡେରାଡୁନ: ହର ହର ଶମ୍ଭୁ ଭଜନ ଗାଇ ଚର୍ଚ୍ଚାରେ ଥିବା ଓଡି଼ଆ ଝିଅ ଅଭିଲିପ୍ସା ପଣ୍ଡା ବର୍ତ୍ତମାନ ଉତ୍ତରାଖଣ୍ଡ ଗସ୍ତରେ ଅଛନ୍ତି । ଏହି ଅବସରରେ ଅଭିଲିପ୍ସା ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କୁ ସାକ୍ଷାତ କରିଛନ୍ତି । ଗତ ଶୁକ୍ରବାର ଦିନ ଡେରାଡୁନସ୍ଥିତ ମୁଖ୍ୟମନ୍ତ୍ରୀ କ୍ୟାମ୍ପ କାର୍ଯ୍ୟାଳୟରେ ଧାମିଙ୍କୁ ଭେଟିଛନ୍ତି ଅଭିଲିପ୍ସା । ଏହି ସମୟରେ ମୁଖ୍ୟମନ୍ତ୍ରୀ ଗାୟିକାଙ୍କୁ ଶୁଭକାମନା ଜଣାଇବା ସହ ଯୁବପିଢିଙ୍କ ପାଇଁ ସେ ପ୍ରେରଣାଦାୟୀ ବୋଲି କହିଛନ୍ତି ।
ମୁଖ୍ୟମନ୍ତ୍ରୀ ଧାମି କହିଛନ୍ତି, ଗାୟିକା ଅଭିଲିପ୍ସା ପଣ୍ଡା ନିଜର ଗୀତର ଯାଦୁରେ ସଙ୍ଗୀତ ଜଗତରେ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି । ଯାହାକି ଯୁବବର୍ଗଙ୍କ ପାଇଁ ଖୁବ୍ ପ୍ରେରଣାଦାୟୀ । ଏଥିପାଇଁ ଧାମି ଅଭିଲିପ୍ସାଙ୍କୁ ଶୁଭକାମନା ଜଣାଇଛନ୍ତି ମୁଖ୍ୟମନ୍ତ୍ରୀ କାର୍ଯ୍ୟାଳୟ ପକ୍ଷରୁ ଏନେଇ ଟ୍ବିଟ୍ କରାଯାଇଛି ।
ଶିବ ଭଜନ ହର ହର ଶମ୍ଭୁ ଗାଇ କେନ୍ଦୁଝରର ଅଭିଲିପ୍ସା ପଣ୍ଡାଙ୍କୁ ସାରା ଦେଶରେ ଲୋକପ୍ରିୟତା ହାସଲ କରିଛନ୍ତି । ଖୁବ୍ କମ ସମୟରେ ଏହି ଗୀତ ମାର୍କେଟରେ ଚହଳ ପକାଇଥିଲା । ଶ୍ରାବଣ ମାସରେ ସବୁଠି ଗୁଞ୍ଜରିତ ହୋଇଥିଲା ହର ହର ଶମ୍ଭୁ । ଏହି ଗୀତରେ ସୋସିଆଲ ମିଡିଆରେ ମାଳ ମାଳ ରିଲ୍ସ ତିଆରି ହୋଇଥିଲା । ତେବେ ଏହି ଗୀତକୁ ନେଇ ସେତେବେଳେ ଚର୍ଚ୍ଚା ବଢିଲା ଯେତେବେଳେ ୟୁଟ୍ୟୁବର ତଥା ମୁସଲିମ ଗାୟିକା ଫରମାନି ନାଜି ହର ହର ଶମ୍ଭୁକୁ ସମାନ ଢଙ୍ଗରେ ଗାଇଲେ । ଏପରିକି ଗୀତର କପିରାଇଟ୍ସକୁ ନେଇ ମଧ୍ୟ ଦାବି କରିଥିଲେ ଫରମାନି ।