ଗୁଜୁରାଟ ଉପକୂଳରୁ ହେରୋଇନ ସହ ପାକିସ୍ତାନୀ ବୋଟ ଜବତ: 9 ପାକିସ୍ତାନୀଙ୍କ ସମେତ 12 ଅଟକ

ଗୁଜୁରାଟ ଉପକୂଳରୁ ପାକିସ୍ତାନୀ ବୋଟ ଜବତ କଲା ATS ଓ ତଟରକ୍ଷୀ ବାହିନୀର ମିଳିତ ଟିମ । ପ୍ରାୟ 280 କୋଟିର 56 କେ.ଜି ହେରୋଇନ ଜବତ । 9 ପାକିସ୍ତାନୀ ସମତେ 12 ଜଣଙ୍କୁ ଅଟକ ରଖିଛି କୋଷ୍ଟଗାର୍ଡ । କରାଚିରୁ ନିଶାଦ୍ରବ୍ୟ ଆସିଥିବା ସନ୍ଦେହ । ଅଧିକ ପଢନ୍ତୁ

ଗାନ୍ଧୀନଗର:ସୀମା ପାର ନିଶା କାରବାର ନିରୋଧୀ ଅପରେସନରେ ବଡ ସଫଳତା । ପାକିସ୍ତାନରୁ ଭାରତକୁ ଚାଲାଣ କରାଯାଉଥିବା ବିପୁଳି ପରିମାଣର ନିଶାଦ୍ରବ୍ୟକୁ ଜବତ କରିବାରେ ସଫଳ ହୋଇଛି ATS ଓ ଭାରତୀୟ ତଟରକ୍ଷୀ ବାହିନୀ । ଆଜି (ଗୁରୁବାର) ଏକ ମିଳିତ ଅପରେସନରେ ଗୁଜୁରାଟ ଉପକୂଳ ଆରବ ସାଗରରେ ଏକ ପାକିସ୍ତାନୀ ବୋଟକୁ ଜବତ କରିବା ସହ ଏଥିରୁ 56 କେଜିର ହେରୋଇନ ଜବତ କରାଯାଇଛି । ଏହି ଘଟଣାରେ ମୋଟ 12 ଜଣଙ୍କୁ ଅଟକ ରଖିଛି ଏଟିଏସ । ସବୁଠାରୁ ବଡ କଥା ହେଲା ଅଟକ ଅଭିଯୁକ୍ତଙ୍କ ମଧ୍ୟରେ 9ଜଣ ପାକିସ୍ତାନୀ ନାଗରିକ ମଧ୍ୟ ରହିଛନ୍ତି ।

ପ୍ରାଥମିକ ଭାବେ ମିଳିଥିବା ସୂଚନା ଅନୁସାରେ, ଏହି ଚାଲାଣ ପାକିସ୍ତାନରୁ ରହି ଅପରେଟ କରାଯାଉଛି । ଆଜି ଜବତ ହୋଇଥିବା ହେରୋଇନର ଆନୁମାନିକ ବଜାର ମୂଲ୍ୟ ପ୍ରାୟ 280 କୋଟି ଟଙ୍କା ହେବା ନେଇ ଆକଳନ କରାଯାଇଛି । ଏହା କରାଚିରୁ ଆସିଥିବା ମଧ୍ୟ ସନ୍ଦେହ କରାଯାଉଛି । ସମସ୍ତଙ୍କୁ ଅଟକ ରଖି ପଚରାଉଚରା ଜାରି ରଖିଛି ଆତଙ୍କବାଦୀ ନିରୋଧୀ ଦଳ (ATS) । ତେବେ ଭାରତୀୟ ଜଳସୀମାରେ ନିୟମିତ ପ୍ରାଟୋଲିଂ ସତ୍ତ୍ବେ ମଧ୍ୟ ପାକିସ୍ତାନୀ ବୋଟ ଭାରତୀୟ ଜଳସୀମାରେ ପ୍ରବେଶ କରିବା ସୁରକ୍ଷା ବ୍ୟବସ୍ଥା ପ୍ରତି ଆହ୍ବାନ ସୃଷ୍ଟି କରିଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ