କୋଲକାତା: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ରାଜ୍ୟପାଳ ଜଗଦୀପ ଧନଖରଙ୍କ ମଧ୍ୟରେ ଥମୁନି ବିବାଦ । ମୁଖ୍ୟମନ୍ତ୍ରୀ ପଦର ଗରିମା ଭୁଲି ରାଜ୍ୟପାଳଙ୍କ ବିରୋଧରେ ବିବାଦୀୟ ବୟାନ ଦେଇଛନ୍ତି ମୁଖ୍ୟମନ୍ତ୍ରୀ ।
ସୋମବାର ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ପଶ୍ଚିମବଙ୍ଗରେ ରାଜ୍ୟପାଳଙ୍କୁ ହଟାଇବା ପାଇଁ ତିନୋଟି ଚିଠି ଲେଖାଯାଇଛି । ସେ ଜଣେ ଭ୍ରଷ୍ଟ ବ୍ୟକ୍ତି । ରାଜ୍ୟପାଳଙ୍କ ନାଁ 1996ରେ ହୱାଲା ଜୈନ ମାମଲାର ଚାର୍ଜସିଟରେ ଆସିଥିଲା ।
ମମତା ବାନାର୍ଜୀ ଅଭିଯୋଗ କରିଛନ୍ତି, ରାଜ୍ୟପାଳ ଜଗଦୀପ ଧନଖର ଜଣେ ଦୁର୍ନୀତିଗ୍ରସ୍ତ ବ୍ୟକ୍ତି, ତାଙ୍କ ନାଁ 1996 ମସିହାରେ ହୱାଲା ଜୈନ ମାମଲାର ଚାର୍ଜସିଟରେ ଥିଲା । ହେଲେ ସେ କୋର୍ଟକୁ ଯାଇଥିଲେ ଏବଂ ସେଠାରୁ ସମସ୍ତ ମାମଲା ରଫାଦଫା କରାଯାଇଥିଲା।
ପୁନର୍ବାର ଧନଖରଙ୍କ ବିରୋଧରେ ଯାଚିକା ଦାଖଲ ହୋଇଥିଲା । ଆଉ ଏବେ କୋର୍ଟରେ ଏହି ମାମଲା ବିଚାରାଧିନ ରହିଥିବା କହିଛନ୍ତି ମମତା ।
ସାମ୍ବାଦିକ ସମ୍ମିଳନୀରେ ମମତା ବାନାର୍ଜୀ କହିଛନ୍ତି, ମୋତେ ଦୁଃଖର ସହ କହିବାକୁ ପଡୁଛି ଯେ ଧନଖର ଜଣେ ଦୁର୍ନୀତିଗ୍ରସ୍ତ ବ୍ୟକ୍ତି। କେନ୍ଦ୍ର ସରକାର କାହିଁକି ଏପରି ରାଜ୍ୟପାଳଙ୍କୁ ନିଯୁକ୍ତ କରନ୍ତି ବୋଲି ପ୍ରଶ୍ନ କରିଛନ୍ତି ଦିଦି ।
