ଗାନ୍ଧୀନଗର: ଗୁଜୁରାଟ ପଞ୍ଚମହଲ ଜିଲ୍ଲାର ଗୋଦ୍ଧ୍ରା ଷ୍ଟେସନରେ 2002 ମସିହାର ସାବରମତୀ ଏକ୍ସପ୍ରେସ ଅଗ୍ନିକାଣ୍ଡ ଘଟିଥିଲା । ଏହି ଅଘଟଣରେ 59 ଜଣ କର୍ମଚାରୀଙ୍କ ମୃତ୍ୟୁ ଘଟିଥିଲା । ଏହି ଅଗ୍ନିକାଣ୍ଡର ମୁଖ୍ୟ ଷଡ଼ଯନ୍ତ୍ରକାରୀ ରାଫିକ ହୁସେନ ଭାତୁକକୁ ପୋଲିସ 19 ବର୍ଷ ପରେ ଗୋଦ୍ଧ୍ରା ସହରରୁ ସୋମବାର ଗିରଫ କରିଛି ।
ଏହି ଅପରାଧିକ ଘଟଣାର ଯୋଜନା କରିଥିବା ଗ୍ରୁପରେ ଭାତୁକ(51) ସାମିଲ ଥିଲା । ତେବେ ପ୍ରାୟ 19 ବର୍ଷ ପୋଲିସ ସନ୍ଧାନ କରିବା ପରେ ସୋମବାର ତାକୁ ଗିରଫ କରାଯାଇଛି ବୋଲି ପଞ୍ଚମହଲ ଏସପି ଲିନା ପାଟିଲ କହିଛନ୍ତି । ରେଳ ଷ୍ଟେସନ ନିକଟରେ ଥିବା ସିଗ୍ନାଲ ଫାଲିଆ ଅଞ୍ଚଳ ନିକଟରେ ଭାତୁକ ରହିଥିବା ପୋଲିସ ବିଶେଷ ସୂତ୍ରରୁ ଖବର ପାଇଥିଲା । ଏହାପରେ ପୋଲିସ ଉକ୍ତ ସ୍ଥାନ ଉପରେ ଚଢାଉ କରି ଭାତୁକକୁ ଗିରଫ କରିଥିଲା ।
ଏହି ଅଗ୍ନିକାଣ୍ଡ 2002 ମସିହା ଫେବୃଆରୀ 27 ତାରିଖରେ ଘଟିଥିବା ବେଳେ ପ୍ରାୟ 59 କର୍ମଚାରୀଙ୍କ ମୃତ୍ୟୁ ଘଟିଥିଲା । ଗୁଜୁରାଟରେ ଏଭଳି ଅଘଟଣ ସେହି ସମୟରେ ରାଜ୍ୟରେ ହଇଚଇ ସୃଷ୍ଟି କରିଥିଲା । ଅପରାଧୀ ଭାତୁକ ଗୋଦ୍ଧ୍ରା ଷ୍ଟେସନରେ ଜଣେ ଶ୍ରମିକ ଭାବେ କାର୍ଯ୍ୟ କରୁଥିବା ଏସପି କହିଛନ୍ତି । ସାବରମତୀ ଏକ୍ସପ୍ରେସରେ ନିଆଁ ଲାଗିବା ପୂର୍ବରୁ ଭାତୁକ କମ୍ପାର୍ଟମେଣ୍ଟ ଉପରକୁ ପଥର ଫିଙ୍ଗିବା ସହିତ ପେଟ୍ରୋଲ ଢାଳିଥିଲା ।
ଏହି ଅଗ୍ନିକାଣ୍ଡ ଘଟାଇବା ପରେ ଭାତୁକ ଦିଲ୍ଲୀ ରେଳ ଷ୍ଟେସନରେ ଓ ଘର ନିର୍ମାଣ କାର୍ଯ୍ୟ କରୁଥିଲା ଏବଂ ଘର ଉପକରଣ ଜିନିଷ ମେଳାରେ ମଧ୍ୟ ବିକ୍ରି କରୁଥିଲା । ଗିରଫ ଭୟରେ ନିଜ ପରିବାରକୁ ସୁଲତାନ ଫାଲିଆରୁ ସିଗ୍ନାଲ ଫାଲିଆକୁ ସ୍ଥାନାନ୍ତର କରିଥିବା ଜଣାପଡିଛି । ଏହି ଘଟଣାର ଆଉ 3 ଜଣ ଅଭିଯୁକ୍ତ ସଲିମ ଇବ୍ରାହିମ ବଦାମ, ଶୌକତ ଚରଖା ଓ ଅବଦୁଲମଜିଦ ୟୁଶୁଫଙ୍କୁ ପୋଲିସ ଏବେ ମଧ୍ୟ ଖୋଜୁଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
