ନୂଆଦିଲ୍ଲୀ:ଭାରତୀୟ ସ୍ଥଳସେନାରେ ଦୀର୍ଘ 42 ବର୍ଷର ସେବା ପରେ ଆଜି (ଶନିବାର) ସ୍ଥଳସେନାର ମୁଖ୍ୟ ପଦରୁ ଅବସର ଗ୍ରହଣ କରିଛନ୍ତି ଜେନେରାଲ ମନୋଜ ମୁକୁନ୍ଦ ନରଓ୍ବାଣେ । ଆଜି ସେ ଅବସର ଗ୍ରହଣ କରିବା ସହ ଦିଲ୍ଲୀର ସାଉଥ ବ୍ଲକରେ ଥିବା ସେନା ମୁଖ୍ୟାଳୟ ପରିସରରେ କ୍ୟାରିୟରର ଶେଷ ଅଭିବାଦାନ (ଗାର୍ଡ ଅଫ୍ ଅନର) ଗ୍ରହଣ କରିଛନ୍ତି । ଅଭବାଦନ ଗ୍ରହଣ ପରେ ସେ ନୂତନ ସେନାମୁଖ୍ୟ ଜେନେରାଲ ମନୋଜ ପାଣ୍ଡେଙ୍କୁ ଦାୟିତ୍ବ ହସ୍ତାନ୍ତର କରିଥିଲେ ।
ମହାରାଷ୍ଟ୍ରରେ ଜନ୍ମିତ ଜେନେରାଲ ନରଓ୍ବାଣେ 1980 ମସିହାରେ ଭାରତୀୟ ସ୍ଥଳସେନାର ଶିଖ ଲାଇଟ ଇନଫ୍ୟାଣ୍ଟ୍ରୀର 7ମ ବାଟାଲିୟନ ମାଧ୍ୟମରେ ସେନାରେ କ୍ୟାରିୟର ଆରମ୍ଭ କରିଥିଲେ । ପରେ ରାଷ୍ଟ୍ରୀୟ ରାଇଫଲର କମାଣ୍ଡିଂ ଅଧିକାରୀ, କୋହିମାରେ ଆସାମ ରାଇଫଲ (ଉତ୍ତର) ଇନସପେକ୍ଟର ଜେନେରାଲ ଭାବେ ମଧ୍ୟ ଦାୟିତ୍ବ ସମ୍ଭାଳିଥିଲେ । ଭାରତୀୟ ସେନାର ମିଶନ ଶ୍ରୀଲଙ୍କା (ଶାନ୍ତିସେନା) ରେ ମଧ୍ୟ ସେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥିଲେ ।