ଚଣ୍ଡିଗଡ:ପଞ୍ଜାବ ଲୁଧିଆନାରେ ପୋଲିସ ଏନକାଉଣ୍ଟରେ କୁଖ୍ୟାତ ଗ୍ୟାଙ୍ଗଷ୍ଟାର ସୁଖଦେବ ସିଂ ଓରଫ ବିିକି ମୃତ । ଆଜି ସଂଧ୍ୟାରେ ଲୁଧିଆନା ନିକଟରେ ତାକୁ ପୋଲିସ ଏନକାଉଣ୍ଟର କରିଛି । ତାର ନାମରେ 25ରୁ ଅଧିକ ସଙ୍ଗୀନ ମାମଲା ରହିଥିଲା । ସେ ଦୀର୍ଘ ଦିନ ହେବ ଫେରାର ରହି ଅପରାଧିକ ମାମଲା ଘଟାଉଥିଲା । ଆଜି ସଂଧ୍ୟାରେ ସେ ଲୁଧିଆନାରେ ନିଜର କିଛି ସହଯୋଗୀଙ୍କ ସହ ଅପରାଧ ଯୋଜନା କରୁଥିବା ସୂଚନା ମିଳିବା ପରେ ପୋଲିସ ଟିମ ଘଟଣାସ୍ଥଳରେ ପହଞ୍ଚିଥିଲା । ଏଥିରେ ବିକି ଓ ତାର ସହଯୋଗୀମାନେ ପୋଲିସ ଉପରୁ ଗୁଳି ମାଡ କରି ଖସି ପଳାଇବାକୁ ପ୍ରୟାସ କରିଥିଲେ । ପୋଲିସ ଏନକାଉଣ୍ଟରରେ ବିକିର ମୃତ୍ୟୁ ହୋଇଛି ।
ପୋଲିସ ସୂଚନା ଅନୁସାରେ, ଅନ୍ୟ ତିନି ଅପରାଧିକ ସହଯୋଗୀଙ୍କୁ ପୋଲିସ ଗିରଫ କରିଛି । ପୋଲିସ ସେମାନଙ୍କୁ ଆତ୍ମସମର୍ପଣ କରିବା ପାଇଁ ଚେତାବନୀ ଦେବା ସହ ଗିରଫ କରିବା ପାଇଁ ପ୍ରୟାସ କରିଥିଲା । ମାତ୍ର ସେମାନେ ପୋଲିସ ଉପରକୁ ଗୁଳି କରିଥିଲେ । ଏଥିରେ ଜଣେ ପୋଲିସ କର୍ମୀ ମଧ୍ୟ ଆହତ ହୋଇଛନ୍ତି । ତାଙ୍କ ଦେହରେ ଗୁଳି ବାଜିଛି ଓ ସେ ହସ୍ପିଟାଲକୁ ସ୍ଥାନାନ୍ତରିତ ହୋଇଛନ୍ତି । ଗ୍ୟାଙ୍ଗଷ୍ଟାର ବିକିର ମୃତଦେହ ବ୍ୟବଚ୍ଛେଦ ପାଇଁ ପଠାଇଛି ପୋଲିସ । ଅନ୍ୟ ତିନି ଅଭିଯୁକ୍ତକୁ ହେପାଜତକୁ ନିଆଯାଇଛି ।