ନୂଆବର୍ଷ ପୂର୍ବରୁ ଗ୍ରହଣ ଲଗାଇଲା ବାଣ, ବିସ୍ଫୋରଣ ଘଟି ୪ମୃତ

ନୂଆବର୍ଷରେ ବେପାର ପାଇଁ ଘରେ କରିଥିଲେ ବାଣ ଦୋକାନ । ହେଲେ ଦୋକାନରେ ଲାଗିଲା ଗ୍ରହଣ । ତାମିଲନାଡୁର ମୋଗାନୁର ମେଟୁଥେରୁରେ ବାଣ ବିସ୍ଫୋରଣ ଘଟି ୪ ଜଣଙ୍କ ମୃ୍ତ୍ୟୁ ହୋଇଥିବା ବେଳେ ୫ ଜଣ ଆହତ ହୋଇଛନ୍ତି । ଅଧିକ ପଢନ୍ତୁ

ଚେନ୍ନାଇ:ନୂଆବର୍ଷ ପୂର୍ବରୁ ଅଘଟଣ । ବାଣ ଦୋକାନରେ ବିସ୍ଫୋରଣ ଘଟି ୪ଜଣ ପ୍ରାଣ ହରାଇଛନ୍ତି । ତାମିଲନାଡୁର ମୋଗାନୁର ମେଟୁଥେରୁ(Moganur Metutheru) ଅଞ୍ଚଳରୁ ସାମ୍ନାକୁ ଆସିଛି ଏଭଳି ଦୁଃଖଦ ଘଟଣା (Four killed in firecracker blast at house in Namakkal)। ଗତକାଲି(ଶନିବାର) ସକାଳେ ଏହି ଭୟଙ୍କର ବିସ୍ଫୋରଣ ହୋଇଥିଲା । ତେବେ ଏହି ବିସ୍ଫୋରଣରେ ସ୍ଥାନୀୟ ଅଞ୍ଚଳର ୧୦ ଟି ଘର କ୍ଷତିଗ୍ରସ୍ତ ହୋଇଥିବା ବେଳେ ୫ ଜଣରୁ ଅଧିକ ଆହତ ହୋଇଛନ୍ତି । ଆହତମାନଙ୍କୁ ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି ।

ସ୍ଥାନୀୟ ପୋଲିସର କହିବା ଅନୁସାରେ, "ନୂଆବର୍ଷ ପାଇଁ ମୃତ୍ୟୁବରଣ କରିଥିବା ପରିବାର ଲୋକେ ଘରେ ବାଣ ଦୋକାନ ଖୋଲିଥିଲେ । ତେବେ ହଠାତ କୌଣସି କାରଣ ପାଇଁ ବାଣ ବିସ୍ଫୋରଣ ହୋଇଥିଲା । ଏହି ସମୟରେ ଘରେ ୫ଜଣ ସଦସ୍ୟ ରହିଥିବା ବେଳେ ୪ ଜଣ ପ୍ରାଣ ହରାଇଥିବା ବେଳେ ସୌଭାଗ୍ୟବଶତଃ ୫ ବର୍ଷୀୟ ଶିଶୁ କନ୍ୟା ଅଳ୍ପକେ ବର୍ତ୍ତି ଯାଇଥିଲା । "

ମୃତକମାନେ ହେଲେ ଘରର ମୁରବୀ ଥିଲାକୁମାର, ତାଙ୍କ ସ୍ତ୍ରୀ, ଥିଲାକୁମାରଙ୍କ ମାଆ ଏବଂ ତାଙ୍କ ପଡୋଶୀ । ବିସ୍ଫୋରଣ ଏତେ ଭୟଙ୍କର ରହିଥିଲା ଯେ, ଥିଲାକୁମାରଙ୍କ ଘରକୁ ଲାଗିଥିବା ୧୦ ଟି ଘର ପ୍ରଭାବିତ ହୋଇଥିଲା । ଏଥିରେ ୫ ଜଣ ଆହତ ହୋଇଥିବା ବେଳେ ସେମାନଙ୍କୁ ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ବସ୍ଫୋରଣର ଖବର ପାଇଁ ମୋଗାନୁର ପୋଲିସ ଏବଂ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ କରିଥିଲେ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ବେଳେ ନିଜ ଆଡୁ ମାମଲା ଦାୟରକରି ତଦନ୍ତ ଆରମ୍ଭ କରିଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ