ଚଣ୍ଡିଗଡ: ପଞ୍ଜାବରୁ ବିପୁଳ ପରିମାଣର ହେରୋଇନ ଜବତ ହୋଇଛି । ପଞ୍ଜାବ ପୋଲିସର ଗୁଇନ୍ଦା ୟୁନିଟ୍ ଦୁଇଟି ଭିନ୍ନଭିନ୍ନ ଅପରେସନ ଚଳାଇ ପ୍ରାୟ ୭୭ କେଜି ହେରୋଇନ ଜବତ କରିଛି । ଅନ୍ତର୍ଜାତୀୟ ବଜାରରେ ଏହି ଡ୍ରଗ୍ସର ମୂଲ୍ୟ ପ୍ରାୟ ୪୦୦ କୋଟି ଟଙ୍କା ହେବ । ଏହି ଘଟଣାରେ ୪ ଜଣ ଡ୍ରଗ୍ସ ଚାଲାଣକାରୀ ଧରା ପଡ଼ିଛନ୍ତି । ସେମାନଙ୍କ ନିକଟରୁ ହେରୋଇନ ସହ ୩ଟି ପିସ୍ତଲ ଜବତ କରାଯାଇଛି । ଚଳିତ ବର୍ଷର ଏହା ସବୁଠୁ ବଡ଼ ଡ୍ରଗ୍ସ ଜବତ ମାମଲା ବୋଲି ଆଜି(ରବିବାର) ପଞ୍ଜାବ ଡିଜିପି ସୂଚନା ଦେଇଛନ୍ତି ।
ପଞ୍ଜାବର ଫିରୋଜପୁର ଅଞ୍ଚଳରୁ ଏହି ହେରୋଇନ ଜବତ ହୋଇଛି । ଏନେଇ ଡିଜିପି ଗୌରବ ଯାଦବ ଟ୍ବିଟ୍ କରିଛନ୍ତି ଯେ, ଗୁଇନ୍ଦା ଏଜେନ୍ସିର ନେତୃତ୍ବରେ ଦୁଇଟି ଭିନ୍ନ ଭିନ୍ନ ଅପରେସନରେ ଫିରୋଜପୁର କାଉଣ୍ଟର ଇଣ୍ଟେଲିଜିଏନ୍ସ ୱିଙ୍ଗ ବଡ ଧରଣର ନିଶାଦ୍ରବ୍ୟ ଚୋରା ଚାଲାଣ ଉଦ୍ୟମ ପଣ୍ଡ କରିଛି । ୪ ଜଣ ଡ୍ରଗ୍ସ ମାଫିଆଙ୍କ ସମେତ ୭୭ କେଜିର ହେରୋଇନ ଜବତ କରାଯାଇଛି । ଦୁଇଟି ଅପରେସନର ଯଥାକ୍ରମେ ୪୧ କେଜି ଓ ୩୬ କେଜି ହେରୋଇନ ଜବତ ହୋଇଛି । ଚାଲାଣକାରୀଙ୍କ ଠାରୁ ୩ଟି ପିସ୍ତଲ ଜବତ ହୋଇଛି । ଏହି ମଡ୍ୟୁଲ ପଞ୍ଜାବରେ ସୀମା ପାର ଏବଂ ଆନ୍ତଃରାଜ୍ୟ ଡ୍ରଗ୍ସ କାରବାରରେ ବେଶ୍ ସକ୍ରିୟ ଥିଲା ।
ଏହାମଧ୍ୟ ପଢନ୍ତୁ: ଗୁଜୁରାଟରୁ ୪୨୫ କୋଟିର ଡ୍ରଗ୍ସ ଜବତ, ୫ ଇରାନ ନାଗରିକ ଗିରଫ