ଗୁରୁଗ୍ରାମ:ଗ୍ୟାଙ୍ଗଷ୍ଟାର ସନ୍ଦୀପ ଗାଡୋଲି ଫେକ୍ ଏନକାଉଣ୍ଟର ମାମଲାରେ ବେଲରେ ଆସିଥିବା ପୂର୍ବତନ ମଡେଲ ଦିବ୍ୟା ପହୁଜାଙ୍କୁ ଗୁରୁଗ୍ରାମର ଏକ ହୋଟେଲରେ ଗୁଳିକରି ହତ୍ୟା କରାଯାଇଛି । 27 ବର୍ଷୀୟ ପୂର୍ବତନ ମଡେଲ ଦିବ୍ୟା ପହୁଜା 2016 ବହୁଚର୍ଚ୍ଚିତ ଗ୍ୟାଙ୍ଗଷ୍ଟାର ସନ୍ଦୀପ ଗାଡୋଲି ଫେକ ଏନକାଉଣ୍ଟର ମାମଲାରେ ଗିରଫ ହୋଇ ଜେଲ ଯାଇଥିଲେ । କିଛି ମାସ ପୂର୍ବରୁ ସେ ବେଲରେ ଆସିଥିଲେ । ତେବେ ତାଙ୍କୁ ଗତକାଲି ଗୁରୁଗ୍ରାମର ଏକ ହୋଟେଲରେ ଗୁଳି କରି ହତ୍ୟା କରାଯାଇଛି । ପୋଲିସ ଏହି ମାମଲାରେ ହୋଟେଲ ମାଲିକ ସମେତ 3 ଜଣ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତମାନେ ହେଲେ ସମ୍ପୃକ୍ତ ହୋଟେଲର ମାଲିକ 56 ବର୍ଷୀୟ ଅଭିଜିତ ସିଂ ଓ ତାର ଦୁଇ ସହଯୋଗୀ 28 ବର୍ଷୀୟ ହେମରାଜ ଓ 23 ଓମପ୍ରକାଶ । ଏହି ଦୁଇ ଯୁବକ ହତ୍ୟାକାଣ୍ଡକୁ ରୂପ ଦିଆଯାଇଥିବା ଅଭିଜିତର ହୋଟେଲରେ କାମ କରୁଥିଲେ । ହତ୍ୟାକାଣ୍ଡରେ 5 ଅଭିଯୁକ୍ତ ସାମିଲ ଥିବା ପୋଲିସ ପ୍ରାଥମିକ ତଦନ୍ତରେ ଜାଣିବାକୁ ପାଇଛି ।
ପୋଲିସର ପ୍ରାଥମିକ ତଦନ୍ତରୁ ମିଳିଥିବା ସୂଚନା ଅନୁସାରେ, ଜେଲରୁ ଫେରିଥିବା ଦିବ୍ୟା ହୋଟେଲ ମାଲିକ ଅଭିଜିତ ସିଂ ମଧ୍ୟରେ ସମ୍ପର୍କ ଥିଲା । ଉଭୟଙ୍କର କିଛି ଆପତ୍ତିଜନକ ଫଟୋ ମଧ୍ୟ ଦିବ୍ୟାଙ୍କ ନିକଟରେ ଥିଲା । ଯାହାକୁ ନେଇ ସେ ଅଭିଜିତକୁ ବ୍ଲାକମେଲ କରିବା ସହ ଲାକ୍ଷାଧିକ ଟଙ୍କା ମଧ୍ୟ ମାଗୁଥିଲା । ଜାନୁଆରୀ 2 ତାରିଖରେ ଅଭିଜିତ ଦିବ୍ୟାଙ୍କୁ ଧରି ଗୁରୁଗ୍ରାମସ୍ଥିତ ନିଜ ହୋଟେଲରେ ପହଞ୍ଚିଥିଲେ । ଉକ୍ତ ଫଟୋ ଡିଲିଟ କରିବା ପାଇଁ କହିଥିଲା ଅଭିଜିତ । ଦିବ୍ୟା ଫଟୋ ଡିଲିଟ କରିବା ପାଇଁ ମନା କରିବା ପରେ ଉଭୟଙ୍କ ମଧ୍ୟରେ ବଚସା ହେବା ପରେ ଅଭିଜିତ ଦିବ୍ୟାଙ୍କୁ ଗୁଳି କରି ହତ୍ୟା କରିଥିଲା । ପରେ ମୃତଦେହକୁ ଲୁଚାଇବା ପାଇଁ ନିଜ ହୋଲଟର ଦୁଇ କର୍ମଚାରୀ ହେମରାଜ ଓ ଓମପ୍ରକାଶର ସହଯୋଗ ନେଇଥିଲା । ମୃତଦେହକୁ ଏକ କୋଠରୀକୁ ନେବା ବେଳର ଭିଡିଓ ମଧ୍ୟ ସିସିଟିଭିରେ ରେକର୍ଡ ହୋଇଛି ।
ତେବେ ପୋଲିସର ଏହି ସୂଚନାକୁ ଦିବ୍ୟାଙ୍କ ପରିବାର ଖଣ୍ଡନ କରିଛି । ଫଟୋ ପାଇଁ କୌଣସି ବ୍ଲାକମେଲିଂରୁ ହତ୍ୟାକାଣ୍ଡ ହୋଇଥିବା କଥାକୁ ସେମାନେ ଅସ୍ବୀକାର କରିବା ସହ ହତ୍ୟାକାଣ୍ଡ ପଛରେ ମୃତ ଗ୍ୟାଙ୍ଗଷ୍ଟାର ସନ୍ଦୀପ ଗାଡୋଲିର ପରିବାର ସଦସ୍ୟଙ୍କ ଭୂମିକା ଥିବା ଅଭିଯୋଗ କରିଛନ୍ତି । ସନ୍ଦୀପ ଗାଡୋଲିର ପରିବାର ସଦସ୍ୟ ଟଙ୍କା ଦେଇ ହୋଟେଲ ମାଲିକ ଅଭିଜିତ ଜରିଆରେ ଏହି ହତ୍ୟାକାଣ୍ଡ ଘଟାଇଥିବା ସେମାନେ ଅଭିଯୋଗ କରିଛନ୍ତି ।