ହାଇଦ୍ରାବାଦ:ମନି ଲଣ୍ଡ୍ରିଂ ମାମଲାରେ ଗିରଫ ହୋଇ ବର୍ଷେରୁ ଅଧିକ ସମୟ ଜେଲରେ ରହିବା ପରେ ଆଜି ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନୀଲ ଦେଶମୁଖ ଜେଲରୁ ମୁକୁଳିଛନ୍ତି (Anil Deshmukh released from jail)। ଏକ ବର୍ଷରୁ ଉର୍ଦ୍ଧ୍ବ ସମୟ ଜେଲରେ ରହିବା ପରେ ଆଜି ସେ ମୁମ୍ବାଇ ଆର୍ଥର ଜେଲ୍ରୁ ମୁକୁଳିବାରେ ସକ୍ଷମ ହୋଇଛନ୍ତି । ଡିସେମ୍ବର 12 ତାରିଖରେ ବମ୍ବେ ହାଇକୋର୍ଟରୁ ଅନିଲଙ୍କୁ ଜାମିନ ମିଳିଥିଲା । 1 ଲକ୍ଷ ଟଙ୍କାର ମୁଚାଲିକାରେ ବେଲ ମଞ୍ଜୁରୀ ସହ ତାଙ୍କୁ 3 ମାସ ଯାଏ ମୁମ୍ବାଇ ଛାଡି ବାହାରକୁ ନଯିବା ପାଇଁ ମଧ୍ୟ ଅଦାଲତ ସର୍ତ୍ତ ରଖିଛନ୍ତି ।
ନଭେମ୍ବର 28 ତାରିଖରେ ଦେଶମୁଖଙ୍କ ବେଲ ମଞ୍ଜୁରୀ ଉପରେ ଆପତ୍ତି ଦର୍ଶାଇଥିଲା ଘଟଣାର ତଦନ୍ତକାରୀ ସଂସ୍ଥା କେନ୍ଦ୍ରୀୟ ତଦନ୍ତ ବ୍ୟୁରୋ । ବେଲ ଆବେଦନ ଉପରେ ରହିତାଦେଶ ଜାରି କରିବା ପାଇଁ ସିବିଆଇ ଆବେଦନ କରିଥିଲେ ସୁଦ୍ଧା ବମ୍ବେ ହାଇକୋର୍ଟ ତାହା ଖାରଜ କରିଦେଇଥିଲେ । ସିବିଆଇ ଆବେଦନ ଖାରଜ ହେବା ପରେ ଦେଶମୁଖଙ୍କ ଜାମିନ ପାଇବା ରାସ୍ତା ପ୍ରାୟତଃ ସ୍ପଷ୍ଟ ହୋଇଥିଲା । 12 ତାରିଖରେ ସେ ବେଲ ପାଇଥିବା ବେଳେ ଆଜି ସଂଧ୍ୟାରେ ସେ ଆର୍ଥର ଜେଲରୁ ମୁକୁଳିଛନ୍ତି ।