ନୂଆଦିଲ୍ଲୀ: ଭାରତୀୟ ପ୍ରତିରକ୍ଷା ଗବେଷଣା ଓ ବିକାଶ ପ୍ରତିଷ୍ଠାନ(DRDO)ର ପୂର୍ବତନ ମହାନିର୍ଦ୍ଦେଶକ ବିଏସ୍ ଅରୁଣାଚଳଙ୍କ ପରଲୋକ ହୋଇଛି । ୮୮ ବର୍ଷ ବୟସରେ ଆମେରିକାରେ ସେ ନିଜର ଶେଷ ନିଶ୍ବାସ ତ୍ୟାଗ କରିଛନ୍ତି । ଏନେଇ ତାଙ୍କର ପରିବାର ପକ୍ଷରୁ ଏକ ବିବୃତ୍ତି ଜରିଆରେ ସୂଚନା ଦିଆଯାଇଛି । ଅରୁଣାଚଳମ ଭାବା ପରମାଣୁ ଅନୁସନ୍ଧାନ କେନ୍ଦ୍ର(BARC), ନ୍ୟାସନାଲ ଏରୋନେଟିକାଲ ଲାବୋରେଟୋରୀ ଓ ଡିଫେନ୍ସ ମେଟାଲର୍ଗିକାଲ ରିସର୍ଚ୍ଚର ଗୁରୁତ୍ବପୂର୍ଣ୍ଣ ପଦପଦବୀରେ କାର୍ଯ୍ୟ କରିଥିଲେ । ଏଥିସହ ୧୯୮୨-୯୨ ମସିହା ଯାଏଁ ପ୍ରତିରକ୍ଷା ମନ୍ତ୍ରୀଙ୍କ ବୈଜ୍ଞାନିକ ପରାମର୍ଶଦାତା ମଧ୍ୟ ଥିଲେ ।
ଅରୁଣାଚଳମ ଆମେରିକାର କାର୍ଲିଫର୍ଣ୍ଣିଆରେ ନିଜ ପରିବାର ସହ ରହୁଥିଲେ । ପରିବାର ଗହଣରେ ତାଙ୍କର ଦେହାନ୍ତ ହୋଇଛି । ଏନେଇ ପରିବାର ପକ୍ଷରୁ ବିବୃତ୍ତିରେ କୁହାଯାଇଛି, ''ଅତ୍ୟନ୍ତ ଦୁଃଖର ସହିତ ଡ. ବିଏସ ଅରୁଣାଚଳଙ୍କ ନିଧନ ସୂଚନା ଦେଉଛୁ । କାର୍ଲିଫର୍ଣ୍ଣିଆରେ ପରିବାର ଲୋକଙ୍କ ଗହଣରେ ସେ ଶାନ୍ତିର ସହ ଚିରନିଦ୍ରାରେ ଶୋଇ ଯାଇଛନ୍ତି ।'' କହିରଖୁଛୁ କି, ୧୯୮୦ ମସିହାରେ ତାଙ୍କୁ ଶାନ୍ତି ସୂରୁପ ଭଟନଗର ପୁରସ୍କାର ପ୍ରଦାନ କରାଯାଇଥିଲା । ବୈଜ୍ଞାନିକ ଅନୁସନ୍ଧାନ ଓ ପ୍ରଯୁକ୍ତି ବିଦ୍ୟା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ସେ ୧୯୮୫ରେ ପଦ୍ମଭୂଷଣ ଓ ୧୯୯୦ ମସିହାରେ ପଦ୍ମ ବିଭୂଷଣର ସମ୍ମାନରେ ସମ୍ମାନିତ ହୋଇଥିଲେ ।
ଏହାମଧ୍ୟ ପଢନ୍ତୁ: ପୂର୍ବତନ ନୌସେନା ଅଧିକାରୀଙ୍କ ୧୦୨ତମ ଜନ୍ମଦିନ, ଶୁଭେଚ୍ଛା ଜଣାଇଲେ ନୌସେନା ମୁଖ୍ୟ