ନୂଆଦିଲ୍ଲୀ:ନବଗଠିତ ବିରୋଧୀ ମିଳିତ ମଞ୍ଚ ଭାରତୀୟ ଜାତୀୟ ପ୍ରଗତିଶୀଳ ସମାବେଶୀ ମେଣ୍ଟ (ଇଣ୍ଡିଆ)ର ଫ୍ଲୋର ଲିଡରମାନେ ଆଜି (ମଙ୍ଗଳବାର) ରାଜ୍ୟସଭାରେ ବିରୋଧୀ ଦଳର ନେତା ତଥା ମୁଖ୍ୟ ବରୋଧୀ ଦଳ କଂଗ୍ରେସର ହାଇକମାଣ୍ଡ ମଲ୍ଲିକାର୍ଜୁନ ଖଡଗେଙ୍କୁ ସାକ୍ଷାତ କରିବେ । ସଂସଦ ଭବନ ପରିସରରେ ଥିବା ଖଡଗେଙ୍କ କାର୍ଯ୍ୟାଳୟରେ ଏହି ସାକ୍ଷାତକାର ହେବାକୁ ଥିବା ବେଳେ ଏଥିରେ ଗୁରୁତ୍ବପୂର୍ଣ୍ଣ ଆଲୋଚନା ହେବକୁ ଥିବା ମଧ୍ୟ ଚର୍ଚ୍ଚା ହେଉଛି । ଆଜି(ମଙ୍ଗଳବାର) ସକାଳ 10 ଟା ସମୟରେ ବିରୋଧୀ ଫ୍ଲୋର ଲିଡରମାନେ ଖଡଗେ ବାସଭବନରେ ଏକାଠି ହେବାର ସୂଚନା ମିଳିଛି ।
ଆଜି ମଣିପୁର ପ୍ରସଙ୍ଗରେ ଗୃହରେ ପ୍ରଧାନମନ୍ତ୍ରୀଙ୍କ ବିବୃତ୍ତି ଦାବି କରି ବିରୋଧୀ ହୋହାଲ୍ଲା କରିଥିଲେ । ଉଭୟ ଲୋକସଭା ଓ ରାଜ୍ୟସଭାର ଗୃହକାର୍ଯ୍ୟ କ୍ରମାଗତ ତୃତୀୟ ଦିନ ପାଇଁ ମଧ୍ୟ ମୁଲତବୀ ରଖାଯାଇଥିଲା । ଗୁରୁବାର(20 ତାରିଖ)ରୁ ଆରମ୍ଭ ହୋଇଥିବା ସଂସଦର ମୌସୁମୀ ଅଧିବେଶନରୁ ଆରମ୍ଭରୁ ଅଚଳ ହୋଇପଡିଛି । ସରକାର ଅନେକ ଗୁରୁତ୍ବପୂର୍ଣ୍ଣ ବିଲ୍ ଆଗତ କରିବାକୁ ଯାଉଥିବା ବେଳେ ପ୍ରଥମ ଦିନରୁ ମଣିପୁର ତାତିରେ ଉଭୟ ଗୃହରେ ହଟ୍ଟଗୋଳ ଓ କ୍ରମାଗତ ମୁଲତବୀ ଲାଗି ରହିଛି । ଗୃହରେ ଚର୍ଚ୍ଚା ପାଇଁ ସରକାର ରାଜି ଥିବା ସଂସଦୀୟ ବ୍ୟାପାର ମନ୍ତ୍ରୀ ଓ କେନ୍ଦ୍ର ଗୃହମନ୍ତ୍ରୀ ସ୍ପଷ୍ଟ କରିସାରିଥିଲେ ସୁଦ୍ଧା ବିରୋଧୀ ସିଧା ପ୍ରଧାନମନ୍ତ୍ରୀଙ୍କ ବିବୃତ୍ତି ଦାବି କରି ହଟ୍ଟଗୋଳ ଜାରି ରଖିଛନ୍ତି । ଆସନ୍ତାକାଲି ଖଡେଗଙ୍କ ଅଧ୍ୟକ୍ଷତାରେ ଏକାଠି ହେବାକୁ ଥିବା ଇଣ୍ଡିଆ ମେଣ୍ଟର ନେତାମାନେ ମଧ୍ୟ ଗୃହରେ ସରକାରଙ୍କୁ ଘେରିବା ଉପରେ ଆଲୋଚନା କରିପାରନ୍ତି ।