ଲକ୍ଷ୍ନୌ: ସର୍ଟ ସର୍କିଟ ଯୋଗୁ ଘରେ ଲାଗିଲା ନିଆଁ । ଶୋଇଥିବା ସମୟରେ ଘରେ ନିଆଁ ଲାଗି ୫ଜଣଙ୍କ ମୃତ୍ୟୁ ହୋଇଥିବା ସୂଚନା ରହିଛି । ସ୍ବାମୀ, ସ୍ତ୍ରୀ ସହ ୩ଜଣ ନିରୀହ ଶିଶୁ ଆଖି ବୁଜିଛନ୍ତି । ଉତ୍ତରପ୍ରଦେଶର କାନପୁର ଦେହତରେ ଏପରି ଛାତିଥରା ଘଟଣା ଘଟିଛି । ଗତକାଲି (ଶନିବାର) ବିଳମ୍ବିତ ରାତିରେ ଏପରି ଅଗ୍ନିକାଣ୍ଡ ଘଟିଥିବା ନେଇ ସ୍ଥାନୀୟ ପୋଲିସ ପକ୍ଷରୁ ସୂଚନା ଦିଆଯାଇଛି ।
ଏନେଇ ପୋଲିସ ଅଧୀକ୍ଷକ ବିବିଜିଟିଏସ୍ ମୁର୍ତ୍ତୀ କହିଛନ୍ତି," ଶନିବାର ବିଳମ୍ବିତ ରାତିରେ ରୁରା ଥାନା ଅନ୍ତର୍ଗତ ହରାମଇ ବଞ୍ଜାରା ଡେରାରେ ଏକ ଝୁମ୍ପୁଡି ଘରେ ନିଆଁ ଲାଗିଯାଇଥିଲା । ଫଳରେ ନିଆଁ ଆଁରେ ଜଳି ଗୋଟିଏ ପରିବାରର ୫ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୩ ଜଣ ଶିଶୁ ରହିଥିଲେ । ମୃତକ ହେଲେ ୩୦ ବର୍ଷୀୟ ସତୀଶ, ୨୬ ବର୍ଷୀୟ ସ୍ତ୍ରୀ କାଜଲ, ୬ ବର୍ଷୀୟ ବାଳକ ସନ୍ନୀ, ୫ ବର୍ଷୀ ସନ୍ଦୀପ ଏବଂ ୩ ବର୍ଷର ଶିଶୁ ଗୁଡିଆ । ପରିବାର ଲୋକେ ଶୋଇଥିବା ସମୟରେ ହଠାତ ନିଆଁ ଲାଗିଯାଇଥିଲା । ଫଳରେ ସେମାନେ ବାହାରକୁ ମଧ୍ୟ ବାହାରି ପାରିନଥିଲେ । ଚିତ୍କାର ଶୁଣି ସ୍ଥାନୀୟ ଲୋକ ପହଞ୍ଚି ବାଲଟିରେ ପାଣି ଢାଳି ନିଆଁ ଲିଭାଇଥିଲେ । ହେଲେ ସେତେବେଳକୁ ସମସ୍ତଙ୍କ ମୃତ୍ୟୁ ହୋଇସାରିଥିଲା । କେବଳ ସତୀଶଙ୍କ ମାଆ ଅଳ୍ପକେ ବର୍ତ୍ତି ଯାଇଥିଲେ ।"