ଗାନ୍ଧୀନଗର:ଚୋର ସାଜିଲା ପୋଲିସ । ରାତିରେ ଥାନା ଭିତରୁ ଲକ୍ଷାଧିକ ଟଙ୍କାର ଜବତ ମଦ ଓ ଫ୍ୟାନ ଚୋରେଇ ନେଲେ ପୋଲିସ ବାବୁ । ଗୁଜୁରାଟ ମହିସାଗର ଜିଲ୍ଲାର ଏକ ଥାନାରୁ ଏହି ଘଟଣା ସାମ୍ନାକୁ ଆସିଛି । ମଦ ଚୋରା ଚାଲାଣ ବେଳେ ଚଢ଼ାଉ କରି ପ୍ରାୟ ୨ ଲକ୍ଷ ଟଙ୍କାର ୪୮୨ ବୋତଲ ମଦ ଓ ଟେବୁଲ ଫ୍ୟାନ ଜବତ କରାଯାଇଥିଲା । ଜବତ ସାମଗ୍ରୀଗୁଡିକ ଯେଉଁ ଥାନାରେ ରଖାଯାଇଥିଲା ସେହି ଥାନାରେ ଆସିଷ୍ଟାଣ୍ଟ ସବ୍ ଇନ୍ସପେକ୍ଟର(ASI) ୪ ଜଣ ପୋଲିସ କର୍ମଚାରୀଙ୍କ ସହ ମିଶି ଏହାକୁ ଚୋରି କରିନେଇଥିଲେ । ଏହିି ଘଟଣା ଜଣାପଡ଼ିବା ପରେ ଏଏସଆଇଙ୍କ ସମେତ ୫ ଜଣଙ୍କୁ ଗିରଫ କରାଯାଇଛି ।
ଡିଏସପି ପିଏସ୍ ଭଲବିଙ୍କ ସୂଚନା ଅନୁସାରେ, ଖାନପୁର ତାଲୁକା ଅନ୍ତର୍ଗତ ବାକୋର ପୋଲିସ ଷ୍ଟେସନର ମହିଳା ଲକ-ଅପ୍ରେ ଜବତ ମଦ ଏବଂ ଫ୍ୟାନଗୁଡିକୁ ରଖାଯାଇଥିଲା । ଜଣେ ସ୍ମଗଲର ଟେବୁଲ ଫ୍ୟାନ ଖୋଳ ପଛରେ ୪୮୨ ବୋତଲ ବିଦେଶୀ ମଦ ରାଜ୍ୟ ଭିତରକୁ ଚାଲାଣ କରିବାକୁ ଉଦ୍ୟମ କରୁଥିଲା । ମଦ ସହିତ ଗାଡିରେ ୭୫ଟି ଟେବୁଲ ଫ୍ୟାନ ରହିଥିଲା । ଏହି ଚୋରା ଚାଲାଣ ସମ୍ପର୍କରେ ବିଶ୍ବସ୍ତ ସୂତ୍ରରୁ ଖବର ପାଇ ପୋଲିସ ଚଢାଉ କରି ଏସବୁ ସାମଗ୍ରୀ ଜବତ କରିଥିଲା । ଜବତ ମଦର ମୂଲ୍ୟ ପ୍ରାୟ ୧ ଲକ୍ଷ ୫୭ ହଜାର ଟଙ୍କା ହୋଇଥିବା ବେଳେ ଫ୍ୟାନର ମୂଲ୍ୟ ୪୦,୫୦୦ ଟଙ୍କା ଅଟେ ।