ନୂଆଦିଲ୍ଲୀ:ନବଗଠିତ ଇଣ୍ଡିଆ ମେଣ୍ଟ ସମନ୍ବୟ କମିଟିର ପ୍ରଥମ ବୈଠକ ଆଜି(ବୁଧବାର) ଅନୁଷ୍ଠିତ ହେବ । ଦିଲ୍ଲୀରେ ଥିବା ଶରଦ ପାୱରଙ୍କ ବାସଭବନରେ ବୈଠକ ବସିବ । ଏଥିରେ ୨୦୨୪ ଲୋକସଭା ନିର୍ବାଚନ ପାଇଁ ଆସନ ବୁଝାମଣା ସଂକ୍ରାନ୍ତରେ ଆଲୋଚନା ହୋଇପାରେ । ଏହି ୧୪ ଜଣିଆ ସମନ୍ବୟ କମିଟିରେ ଏନସିପି ସୁପ୍ରିମୋ ଶରଦ ପାୱରଙ୍କ ସମେତ କଂଗ୍ରେସ ନେତା କେସି ବେଣୁଗୋପାଳ, ଆମ ଆଦମୀ ପାର୍ଟିର ରାଘବ ଚଢା, ରାଷ୍ଟ୍ରୀୟ ଜନତା ଦଳ(JDU)ର ତେଜସ୍ବୀ ଯାଦବ ଏବଂ ତୃଣମୂଳ କଂଗ୍ରେସ ନେତା ଅଭିଷେକ ବାନାର୍ଜୀ ପ୍ରମୁଖ ସଦସ୍ୟ ରହିଛନ୍ତି ।
ସୂଚନା ଅନୁଯାୟୀ, ପାୱାରଙ୍କ ଦିଲ୍ଲୀ ସ୍ଥିତ ବାସଭବନରେ ସମନ୍ବୟ କମିଟିର ନେତାମାନେ ଆଜି ଏକାଠି ହୋଇ ଆଲୋଚନା କରିବେ । କେନ୍ଦ୍ରର ବିଜେପି ସରକାର ଦେଶରେ ଏକକ ନିର୍ବାଚନ ପାଇଁ ସଙ୍କେତ ଦେଇ ସାରିଥିବା ବେଳେ ଏହି ଦୃଷ୍ଟିରୁ ଇଣ୍ଡିଆ ମେଣ୍ଟ ସମନ୍ବୟ କମିଟିର ପ୍ରଥମ ବୈଠକ ଗୁରୁତ୍ବପୂର୍ଣ୍ଣ ହୋଇପଡିଛି । ବିରୋଧୀ ନେତାମାନେ ପୂର୍ବରୁ ଘୋଷଣା କରିସାରିଛନ୍ତି ଯେ, ସେମାନେ ଯେକୌଣସି ସମୟରେ ଏକାସଙ୍ଗେ ବିଧାନସଭା ଓ ଲୋକସଭା ନିର୍ବାଚନ ପାଇଁ ପ୍ରସ୍ତୁତ ରହିବେ ।
ଅନ୍ୟପଟେ ବୈଠକ ପୂର୍ବରୁ ସମନ୍ବୟ କମିଟିର ସଦସ୍ୟ ଥିବା ଟିଏମସି ନେତା ଅଭିଷେକ ବାନାର୍ଜୀ ଇଡିରେ ହାଜର ହୋଇଛନ୍ତି । ପଶ୍ଚିମବଙ୍ଗ ସ୍କୁଲ ନିଯୁକ୍ତି ଦୁର୍ନୀତି ମାମଲାରେ ଇଡି ତାଙ୍କୁ ପଚରାଉଚରା ପାଇଁ ସମନ କରିଥିଲା । ଫଳରେ ସେ ଆଜି କୋଲକାତା ସ୍ଥିତି ଇଡି ଅଫିସକୁ ଯାଇଥିବା ସୂଚନା ମିଳିଛି ।