ନୂଆଦିଲ୍ଲୀ:ଶକ୍ତିଶାଳୀ ହେବ ଭାରତୀୟ ବାୟୁସେନା । ଭଦୋଦରାରେ ଅବତରଣ କଲା ପ୍ରଥମ C-295 ବିମାନ । 13 ତାରିଖରେ ସ୍ପେନର ଏୟାରବସ କମ୍ପାନୀ ପୂର୍ବ ଚୁକ୍ତି ଅନୁସାରେ କମ୍ପାନୀ ନିର୍ମିତ ମିଡିୟମ ଲିଫ୍ଟ ଟେକ୍ଟିକାଲ ଟ୍ରାନ୍ସପୋର୍ଟ ଏୟାରକ୍ରାଫ୍ଟ C-295 ବର୍ଗର ଗୋଟିଏ ବିମାନକୁ ଭାରତୀୟ ବାୟୁସେନାକୁ ହସ୍ତାନ୍ତର କରାଯାଇଥିଲା । ସ୍ପେନ କର୍ତ୍ତୃପକ୍ଷଙ୍କ ଠାରୁ ଏହାକୁ ଭାରତୀୟ ବାୟୁସେନା ମୁଖ୍ୟ ଏୟାର ଚିଫ ମାର୍ଶଲ ବି.ଆର ଚୌଧୁରୀ ଗ୍ରହଣ କରିଥିଲେ । ଆଜି ପ୍ରଥମ ବିମାନ ଭାରତ ମାଟିରେ ଅବତରଣ କରିଛି । ଗୁଜୁରାଟର ଭଦୋଦରା ଏୟାର ଫୋର୍ସ ବେସରେ ପ୍ରଥମ ବିମାନ ଲ୍ୟାଣ୍ଡିଂ କରିଛି । ତେବେ ଆସନ୍ତା କିଛି ଦିନ ମଧ୍ୟରେ ନୂଆଦିଲ୍ଲୀ ଉପକଣ୍ଠ ହିଣ୍ଡନ ଏୟାର ବେସରେ ଏକ ସ୍ବତନ୍ତ୍ର ଉତ୍ସବରେ ଏହି ବିମାନକୁ ବାୟୁସେନାରେ ବିଧିବଦ୍ଧ ଭାବେ ସାମିଲ କରାଯିବ ।
ଚଳିତ 13 ତାରିଖରେ ସ୍ପେନରେ ବାୟୁସେନା ମୁଖ୍ୟ ଏକ କାର୍ଯ୍ୟକ୍ରମରେ ଏହି ଚୁକ୍ତି ଅନୁସାରେ ପ୍ରଥମ ବିମାନ ଗ୍ରହଣ କରିଥିଲେ । ଦୁଇ ବର୍ଷ ପୂର୍ବେ ଭାରତ-ସ୍ପେନ ମଧ୍ୟରେ ଏହି ଚୁକ୍ତିନାମା ସ୍ବାକ୍ଷରିତ ହୋଇଥିଲା । ମୋଟ 21,935 କୋଟି ବ୍ୟୟରେ ଭାରତ ସ୍ପେନର ଅଗ୍ରଣୀ ବିମାନ ନିର୍ମାଣକାରୀ କମ୍ପାନୀ ଏୟାରବେସ ଠାରୁ 56 ଟି C295 ବିମାନ କ୍ରୟ କରିବାକୁ ଚୁକ୍ତିବଦ୍ଧ ହୋଇଛି । ଏହାକୁ ଭାରତୀୟ ବାୟୁସେନାରେ ସାମିଲ କରାଯିବା ପରେ ଏହା ଆର୍ଭୋ-748 ଫ୍ଲିଟ (Avro--748 fleet)ର ସ୍ଥାନ ଅଧିଗ୍ରହଣ କରିବ । ମୋଟ 56 ବିମାନ ମଧ୍ୟରୁ 16 ଟି C-95 ଏୟାରକ୍ରାଫ୍ଟ ସ୍ପେନ୍ରେ ନିର୍ମାଣ ହେବାକୁ ଥିବା ବେଳେ ଅବଶିଷ୍ଟ ବିମାନ ଭାରତରେ ନିର୍ମାଣ ହେବ । ଏଥିପାଇଁ ସ୍ପେନର ଏୟାରବସ୍ କମ୍ପାନୀ ଓ ଭାରତର ଟାଟା ଆଡଭାନ୍ସ ମଧ୍ୟରେ ଚୁକ୍ତି ହୋଇଛି । ଉଭୟ କମ୍ପାନୀ ମିଳିତ ଭାବେ ଏହି ବିମାନ ନିର୍ମାଣ କରି ବାୟୁସେନାକୁ ହସ୍ତାନ୍ତର କରିବେ ।