ନୂଆଦିଲ୍ଲୀ: ସାରା ବିଶ୍ବରେ ଏବେ ବି ଜାରି ରହିଛି କୋରୋନା ବିପର୍ଯ୍ୟୟ । ଅନେକ ଦେଶରେ କୋରୋନା ଭାଇରସ ବର୍ତ୍ତମାନ ଶିଶୁଙ୍କୁ ଅଧିକ ସଂକ୍ରମିତ କରୁଛି । ଭାରତରେ ତୃତୀୟ ୱେଭ ଆଗମନରେ କେବଳ ପିଲାମାନେ ଅଧିକ ସଂକ୍ରମିତ ହୋଇଥିବା ଦାବି କରାଯାଇଥିଲା। ଏସବୁ ମଧ୍ୟରେ ଶିଶୁଙ୍କ ଟିକା ଉପରେ ସାରା ବିଶ୍ବ ଏବେ ଦ୍ରୁତ ଗତିରେ କାର୍ଯ୍ୟ କରୁଛି। ଏହି ସମୟରେ ଆମେରିକାର ଫାର୍ମାସ୍ୟୁଟିକାଲ୍ କମ୍ପାନୀ ଫାଇଜର ଶିଶୁ ଟିକା ଉତ୍ପାଦନରେ ଆଉ ଏକ ସଫଳତା ହାସଲ କରିଛି ।
ଫାଇଜରର କୋରୋନା ଟିକା 5 ରୁ 11 ବର୍ଷ ବୟସ ଶିଶୁଙ୍କ ଉପରେ 91 ପ୍ରତିଶତ ପ୍ରଭାବଶାଳୀ ବୋଲି ଦର୍ଶାଯାଇଛି। ତେବେ ଏହି ପରୀକ୍ଷାର ଫଳାଫଳ ଶୁକ୍ରବାର ଆନୁଷ୍ଠାନିକ ଭାବେ ଘୋଷଣା କରାଯାଇଛି । ବିଶେଷ କରି ଏହା କୁନି ପିଲାଙ୍କ ଭିତରେ ପ୍ରଚୁର ମାତ୍ରାରେ ଆଣ୍ଟିବଡି ବା କୋରୋନା ବିରୋଧୀ ପ୍ରତିରୋଧ ଶକ୍ତି ତିଆରି କରିପାରୁଛି ।