ହାଇଦ୍ରାବାଦ: ତେଲେଙ୍ଗାନାରେ ମର୍ମନ୍ତୁଦ ସଡକ ଦୁର୍ଘଟଣା । ଟ୍ରାକ୍ଟରକୁ ଏକ ଟ୍ରକ ଧକ୍କା ଦେବାରୁ ୫ଜଣଙ୍କର ମୃତ୍ୟୁ ହୋଇଥିବା ସୂଚନା । ଏହି ଦୁର୍ଘଟଣାରେ ଅନେକ ଆହତ ହୋଇଥିବା ମଧ୍ୟ ଜଣାପଡିଛି । ଶନିବାର ବିଳମ୍ବିତ ରାତିରେ ସୂର୍ଯ୍ୟପେଟ ଜିଲ୍ଲା ମୁନାଗାଲାରେ ଏହି ଦୁର୍ଘଟଣା ଘଟିଥିଲା । ସମସ୍ତ ଆହତଙ୍କୁ କୋଡାଡା ଡାକ୍ତରଖାନାରେ ଭର୍ତ୍ତି କରାଯାଇଛି ।
ମିଳିଥିବା ସୂଚନା ଅନୁଯାୟୀ ଶନିବାର ଏକ ଟ୍ରାକ୍ଟରରେ ମୁନାଗାଲା ମଣ୍ଡଳରୁ ପ୍ରାୟ ୩୮ ଜଣ ଯାତ୍ରୀ ଆୟାପସ୍ୱାମୀ ମନ୍ଦିରରେ ମହାପାଡି ପୂଜାରେ ଯୋଗଦେବାକୁ ଯାଇଥିଲେ । ସେଠାରେ ପୂଜା ସାରି ଫେରୁଥିବା ସମୟରେ ବିଜୟଓ୍ବାଡା ହାଇଦ୍ରାବାଦ ଜାତୀୟ ରାଜପଥ ରାସ୍ତାରେ ଫେରୁଥିଲେ । ଏହି ସମୟରେ ହାଇଦ୍ରାବାଦରୁ ବିଜୟୱାଡା ଆଡକୁ ଯାଉଥିବା ଏକ ଟ୍ରକ ଟ୍ରାକ୍ଟରକୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ୫ଜଣଙ୍କର ମୃତ୍ୟୁ ହୋଇଥିଲା । ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସମସ୍ତ ଆହତଙ୍କୁ କୋଡାଡା ହସ୍ପିଟାଲରେ ଭର୍ତ୍ତି କରିଥିଲା । ସେହିପରି ଗୁରୁତର ଥିବା ଲୋକଙ୍କୁ କାମାମ ଏବଂ ସୂର୍ଯ୍ୟପେଟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା ।