ଭୋପାଲ: ନିଜ ଚାଷ ଜମିରୁ ମୂଲ୍ୟବାନ ହୀରା ପଥର ପାଇ ଲକ୍ଷପତି ହେଲେ ଚାଷୀ । ମଧ୍ୟପ୍ରଦେଶର ପାନ୍ନା ସହରର ଜଣେ 45 ବର୍ଷୀୟ କୃଷକ ନିଜ ଚାଷ ଜମିରୁ 14.98 କ୍ୟାରେଟ୍ ହୀରା ପାଇଛନ୍ତି । ଯାହାର ମୂଲ୍ୟ 60.60 ଲକ୍ଷ ଟଙ୍କା ବୋଲି ଜଣାପଡିଛି । ସେପଟେ ଏହାକୁ ନେଇ ଚାଷୀ ଜଣଙ୍କ ବେଶ ଖୁସି ବ୍ୟକ୍ତ କରିଛନ୍ତି । ଏହା ଇଶ୍ୱରଙ୍କ ଉପହାର । ଏହି ଟଙ୍କା ନିଜ ପିଲାଙ୍କ ପାଠପଢାରେ ଲଗାଇବି ବୋଲି କହିଛନ୍ତି ।
ସୂଚନାନୁସାରେ, ଲଖନ ଯାଦବ ଗତ ମାସରେ ପାନ୍ନା ଜିଲ୍ଲାର କୃଷ୍ଣ କଲ୍ୟାଣପୁର ଅଞ୍ଚଳରେ ଥିବା ତାଙ୍କ ଚାଷ ଜମିରୁ 14.98 କ୍ୟାରେଟ୍ ହୀରା ପାଇଥିଲେ ।
ଏହି ସମୟରେ ପାନ୍ନା ଜିଲ୍ଲା କଲେକ୍ଟର ସଞ୍ଜୟ କୁମାର ମିଶ୍ର କହିଛନ୍ତି ଯେ ମୋଟାମୋଟି ଭାବେ 269.16 କ୍ୟାରେଟର 203ଟି ହୀରା ନିଲାମ ପାଇଁ ରଖାଯାଇଛି, କିନ୍ତୁ ସେଥିରୁ 131ଟି ବିକ୍ରି ହୋଇପାରିବ ନାହିଁ । ଆସନ୍ତା ବର୍ଷ ଏହି ହୀରା ନିଲାମ ହେବ । ନିଲାମରେ କୋରୋନାର ପ୍ରଭାବ ଦେଖିବାକୁ ମିଳିଥିଲା କାରଣ ପୂର୍ବ ବର୍ଷ ତୁଳନାରେ ଏଥିରେ କମ୍ ସଂଖ୍ୟକ ବ୍ୟବସାୟୀ ଏଥିରେ ଭାଗ ନେଇଥିଲେ ।
ଦୁଇ ଏକର ଜମି ଥିବା କ୍ଷୁଦ୍ର କୃଷକ ଯାଦବଙ୍କ ପାଇଁ ଏହା ପ୍ରଥମ ହୀରା ଉତ୍ତୋଳନ ଏବଂ ନିଲାମରେ ଏହି ରତ୍ନ 60.60 ଲକ୍ଷ ଟଙ୍କାରେ ବିକ୍ରି ହୋଇଥିଲା ବୋଲି ସୂତ୍ରରୁ ପ୍ରକାଶ । ମଧ୍ୟପ୍ରଦେଶର ଦରିଦ୍ର ବୁନ୍ଦେଲଖଣ୍ଡ ଅଞ୍ଚଳର ପାନ୍ନା ହୀରା ଖଣି ପାଇଁ ଜଣାଶୁଣା । ଏହାପୂର୍ବରୁ ତିନି ଜଣ ବ୍ୟକ୍ତି ଖଣିରୁ ହୀରା ପାଇଥିଲେ କିନ୍ତୁ ଯାଦବଙ୍କ କାହାଣୀ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
